نو مئی مقدمات: عمران خان کی ضمانتوں کا تحریری فیصلہ جاری

لاہور کی انسداد دہشت گردی کی عدالت نے 9 مئی کے چار مقدمات میں عمران خان کی ضمانتوں کی منظوری کا تحریری فیصلہ جاری کر دیا ہے۔

اے ٹی سی کے جج ارشد جاوید نے پانچ صفحات پر مشتمل فیصلہ میں کہا کہ ریکارڈ کے مطابق عمران خان ان مقدمات میں نامزد نہیں تھے، بلکہ انہیں ضمنی بیان کی بنیاد پر نامزد کیا گیا۔ اس فیصلے میں کہا گیا کہ عمران خان نے مبینہ واردات کے لیے مجرمانہ سازش کی حوصلہ افزائی کی تھی۔

عدالت نے یہ بھی کہا کہ پولیس افسران نے اس سازش کو سنا تھا لیکن انہوں نے اپنے کسی اعلیٰ افسر کو آگاہ نہیں کیا۔ مزید برآں، 9 مئی کو عمران خان کو اسلام آباد ہائی کورٹ سے گرفتار کیا گیا تھا، اور وہ سپریم کورٹ میں 9 مئی کے واقعات کی مذمت کر چکے ہیں۔ انہوں نے کہا تھا کہ وہ کبھی بھی اپنے کارکنوں کو پُرتشدد مظاہروں کی ترغیب نہیں دیتے۔

عدالت نے اپنے حکم میں کہا کہ پراسیکیوشن کی دستاویزات کے مطابق عمران خان کو پولیس افسران کی معلومات کی بنیاد پر نامزد کیا گیا تھا، جبکہ ریکارڈ کے مطابق دیگر شریک ملزمان اور اعجاز چوہدری موقع پر موجود تھے۔

تاہم عدالت نے یہ بھی کہا کہ درخواست گزار (عمران خان) کے خلاف موجودہ شواہد کے مطابق وہ موقع پر نہیں تھے، اور ان کے خلاف جرم ثابت کرنے کے لیے مزید تحقیقات کی ضرورت ہے۔ عدالت نے یہ بھی کہا کہ عمران خان کے کردار کا جائزہ ٹرائل کے دوران لیا جائے گا۔