ترک صدر رجب طیپ اردوان کا طیارہ پاکستان کی حدود میں داخل

ترک صدر رجب طیپ اردوان کی پاکستان آمد پر پاکستان ایئرفورس کے جے ایف-17 تھنڈر طیارے اور ایف سولہ طیاروں نے ان کے صدارتی طیارے کو پاکستان کی فضائی حدود میں داخل ہوتے ہی پروٹوکول کے طور پر گھیرے میں لے لیا، جبکہ شاہراہ دستور کو ترکیہ کے پرچموں سے سجا دیا گیا ہے۔

ترک صدر طیپ اردوان دو روزہ دورے پر پاکستان پہنچ رہے ہیں۔ترک صدر دورے کے دوران ترکیہ-پاکستان بزنس انویسٹمنٹ فورم سے بھی خطاب کریں گے۔یہ ان کا پانچ سال بعد پاکستان کا پہلا دورہ ہوگا، جس میں ان کی وزیراعظم شہباز شریف سمیت اعلیٰ سیاسی قیادت سے ملاقاتیں متوقع ہیں۔

ترکیہ صدر طیب اردگان کی آمد پر وزیر اعظم پاکستان شہباز شریف نے ٹویٹ پیغام میں کہا کہ میرے پیارے بھائی صدر رجب طیب اردوان، اور میری قابل احترام بہن خاتون اول ایمن ایردوان، میں اور پوری پاکستانی قوم پاکستان میں آپ کا پرتپاک خیر مقدم کرتی ہے۔ میرے بھائی، صدر ایردوان، ایک بصیرت والے سیاستدان ہیں، جنھوں نے ترکی کو بدل دیا ہے۔

ان کی متحرک قیادت میں پاکستان اور ترکی کے درمیان تاریخی، گہرے اور برادرانہ تعلقات مضبوط سے مضبوط تر ہوتے جارہے ہیں۔
صدر اردوان کے تاریخی دورے کے پر، ہم ان مضبوط تعلقات کو مزید بلندیوں تک پہنچانے کے خواہشمند ہیں۔

وزیراعظم شہباز شریف اور ترک صدر ساتویں پاک ترک ہائی لیول اسٹریٹیجک کونسل کے اجلاس کی مشترکہ صدارت کریں گے۔ دفتر خارجہ کے مطابق ترک صدر کا دورہ ملائیشیا اور انڈونیشیا کے دورے کے بعد ہو رہا ہے، اور ان کے ہمراہ ترک وزرا، سینیئر حکام اور سرمایہ کاروں پر مشتمل اعلیٰ سطحی وفد بھی ہوگا۔

دفتر خارجہ کے مطابق، اجلاس کے اختتام پر اہم معاہدوں اور ایم او یوز پر دستخط کیے جائیں گے، جب کہ وزیراعظم شہباز شریف اور ترک صدر اردوغان مشترکہ پریس کانفرنس بھی کریں گے۔ اس سے قبل ہائی لیول اسٹریٹیجک کونسل کا چھٹا اجلاس فروری 2020 میں منعقد ہوا تھا۔

ترک صدر دورے کے دوران ترکیہ-پاکستان بزنس انویسٹمنٹ فورم سے بھی خطاب کریں گے، جبکہ ان کی پاکستانی قیادت سے ملاقاتوں میں غزہ اور مشرق وسطیٰ کی صورتحال سمیت اہم علاقائی و عالمی امور پر تبادلہ خیال کیا جائے گا۔

پاکستان اور ترکیہ کے درمیان گزشتہ چند برسوں میں دو طرفہ اسٹریٹیجک شراکت داری میں نمایاں پیش رفت ہوئی ہے، خاص طور پر دفاعی شعبے میں دونوں ممالک کے تعلقات مزید مضبوط ہوئے ہیں۔ پاکستان ترکی سے ملجم پروجیکٹ کے تحت جنگی بحری جہاز خریدنے والا پہلا ملک ہے اور پہلے ہی ترکیہ سے آقنچی، بیرکتار اور ٹی بی ٹو ڈرونز حاصل کر چکا ہے۔