چیف آف آرمی سٹاف جنرل سید عاصم منیر کا یونیورسٹیز اور طلبہ کالجز کے طلبہ سے خطاب

چیف آف آرمی سٹاف جنرل سید عاصم منیرنے یونیورسٹیز اور کالجز کے طلبہ سے خطاب کیا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر نے پاکستان بھر سے نوجوانوں کی نمائندگی کرنے والے یونیورسٹیز اور کالجز کے طلبہ سے خطاب کیا۔انہوں نے کہا کہ پاکستانی عوام، بالخصوص نوجوانوں کا پاک فوج سے ایک انتہائی مضبوط رشتہ ہے۔آرمی چیف نے طلباء کو تعلیمی میدان میں عمدہ کارکردگی کا مظاہرہ کرنے کی تلقین کی اور ایسی مہارتیں حاصل کرنے کی ترغیب دی ،جو انہیں ملکی ترقی میں مثبت کردار ادا کرنے کے قابل بنائیں ۔

پاک فوج کے سربراہ نے نوجوانوں کی توانائی، تخلیقی صلاحیت اور اختراعی صلاحیتوں کی تعریف کی، انہوں نے کہا کہ نوجوان ہی پاکستان کے مستقبل کے رہنما ہیں اور طلبہ پر‘پاکستانیت‘ کو اپنانے کی ضرورت پر زور دیا۔ آرمی چیف نے پاکستان کی تاریخ، ثقافت اور اقدار کی اہمیت کو نوجوانوں کے فکری ارتقاء کے لئے اہم قرار دیا۔

سپہ سالار نے خاص طور پر سرحد پار سے دہشت گردی کے خطرے پر بھی خیالات کا اظہار کیا۔ انہوں نے کہ پاکستان کے آئین کا آغاز بھی اِنَّ الحکم اِلَّاللّٰہ (حاکمیت صرف اللّٰہ کی ہے) سے ہوتا ہے، یہ فتنہ الخوارج کس شریعت اور دین کی بات کرتے ہیں؟۔ہم کبھی بھی فتنہ الخوارج کو اپنی فرسودہ سوچ ملک پر مسلط نہیں کرنے دیں گے۔غیور خیبر پختونخوا ہ اور بلوچستان کے غیور لوگ دہشت گردوں کے خلاف آہنی دیوار کی طرح کھڑے ہیں۔

جنر سید عاصم منیر نے پاکستان کی خودمختاری اور علاقائی سالمیت کے تحفظ کے لئے پاک فوج کے کردار کو اجاگر کیااوردہشت گردی کے خلاف قومی جدوجہد میں پاکستانی عوام کی قربانیوں کو خراج تحسین پیش کیا۔انہوں نے کہا کہ انشاءاللہ ملک دشمن عناصر کی فوج اور عوام کے درمیان خلیج ڈالنے کی کوشش ہمیشہ ناکام رہی ہے اور رہے گی۔ہمیں ا پنے مذہب، تہذیب اور روایات پر فخر ہے۔ آرمی چیف نے مسلح افواج اور قانون نافذ کرنے والے اداروں کی ثابت قدمی اور تعاون کی تعریف کی۔