جنوری 2025 میں ملک بھر میں گاڑیوں کی فروخت میں 65 فیصد تک اضافہ ریکارڈ

رواں سال 2025 کے پہلے مہینے میں ملک بھر میں گاڑیوں کی فروخت کے حوالے سے بڑی پیشرفت سامنے آئی ہے اور گزشتہ سال کے مقابلے میں گاڑیوں کی فروخت میں 65 فیصد اضافہ ریکارڈ کیا گیا ہے۔

تفصیلات کے مطابق ملک بھر میں 2025 کے پہلے مہینے جنوری میں گاڑیوں کی ریکارڈ فروخت سامنے آئی ہے اور جنوری کےمہینے میں گزشتہ سال کے مقابلے میں 65 فیصد تک اضافہ ریکارڈ کیا گیا ہے۔ گرتی شرحِ سود، سستی آٹو فنانسنگ اور صارفین کی بڑھتی قوتِ خرید کے بعد جنوری 2025 میں گاڑیوں کی فروخت 25 ماہ کی بلند ترین سطح پر پہنچ گئی۔

جنوری 2025 کے حوالے سے پاکستان آٹو موٹیو مینوفیکچررز ایسوسی ایشن (پاما) کے اعداد و شمار کے مطابق جنوری 2025 میں گاڑیوں کی فروخت میں سالانہ 61 فیصد اور ماہانہ 65 فیصد اضافہ ہوا۔ پاما کے مطابق جنوری 2025 میں 17 ہزار 10 گاڑیاں فروخت ہوئیں جو کہ دسمبر 2022 کے بعد جنوری 2025 میں گاڑیوں کی ریکارڈ فروخت تھی۔

پاکستان آٹو موٹیو مینوفیکچررز ایسوسی ایشن کا کہنا ہے کہ مالی سال 2025 کے 7 ماہ میں گاڑیوں کی فروخت میں سالانہ 56 فیصد اضافہ ہوا ہے۔ پاکستان آٹو موٹیو مینوفیکچررز ایسوسی ایشن نے بتایا کہ مالی سال 2025 کے 7 ماہ میں 78 ہزار 186 گاڑیاں فروخت ہوئیں۔