وسطی امریکی ملک گوئٹے مالا میں مسافر بس کھائی میں جا گری، حادثے میں کم از کم 55 افراد ہلاک اور متعدد زخمی ہوگئے۔
غیر ملکی خبر رساں ایجنسی کے مطابق پیر کے روز گوئٹے مالا میں ایک مسافر بس پُل کے حفاظتی جنگلے کو توڑتی ہوئی 20 میٹر گہری کھائی میں گری، جس کے نتیجے میں کم از کم 55 افراد جان کی بازی ہار گئے۔
میڈیا رپورٹ کے مطابق مسافر بس میں تقریباً 75 افراد سوار تھے ، ہلاک ہونے والوں میں 36 مرد اور 15 خواتین شامل ہیں جبکہ زخمی مسافروں کو مختلف اسپتالوں میں منتقل کیا گیا ہے، جن میں سے کئی کی حالت تشویشناک بتائی جا رہی ہے۔
فائر ڈپارٹمنٹ کے مطابق ڈرائیور بس کا کنٹرول کھو بیٹھا تھا اور بس کئی چھوٹی گاڑیوں سے ٹکرا کر کھائی میں جا گری۔
واضح رہے کہ یہ گوئٹے مالا میں حالیہ برسوں کا بدترین ٹریفک حادثہ قرار دیا جا رہا ہے، گوئٹے مالا کے صدر نے حادثے پر افسوس کا اظہار کرتے قومی سوگ کا اعلان کیا ہے۔
وزیر مواصلات نے بتایا کہ ابتدائی تحقیقات کے مطابق بس 30 سال پرانی تھی لیکن اسے تاحال سڑک پر چلنے کی اجازت حاصل تھی ، حادثے کی اصل وجہ ابھی معلوم نہیں، تاہم حکام یہ جانچ رہے ہیں کہ آیا بس میں ضرورت سے زیادہ مسافر تو سوار نہیں تھے۔
By 
