امریکی اخبار میں ڈونلڈ ٹرمپ کو عمران خان کی سیاست سے دوری کا مشورہ

امریکہ کے معروف اخبار واشنگٹن ایگزمینر میں شائع ہونے والے ایک مضمون میں امریکی صدر ڈونلڈ ٹرمپ کوعمران خان کی سیاست سے دوری کا مشورہ دیا گیا۔

شائع مضمون میں کہا گیا ہے کہ عمران خان اور ان کی سیاست امریکہ اور امریکی مفادات کے لیے خطرناک ہو سکتی ہے۔مضمون میں یہ بھی کہا گیا کہ عمران خان کی سیاست امریکی دشمنی پر مبنی ہے اور انہوں نے اپنے سیاسی مفادات کے لیے امریکہ مخالف مہم چلا کر عوام میں مقبولیت حاصل کی ہے۔

اس کے علاوہ بین الاقوامی تعلقات عامہ کے حوالے سے عمران خان کی شخصیت پر اعتبار نہیں کیا جا سکتا۔مضمون میں مزید کہا گیا کہ بانی پی ٹی آئی کی طالبان کی حمایت، دہشت گردی کے خلاف جنگ اور اسامہ بن لادن کے حوالے سے امریکی موقف سے متضاد نظریات ہیں، جس کی وجہ سے امریکہ ان کے نقطہ نظر کی حمایت نہیں کر سکتا۔

مزید پڑھیں: عمران خان اور بشریٰ بی بی کی ناکام بغاوت کے ثبوت منظر عام پر آگئے، عظمیٰ بخاری

اس کے علاوہ مضمون میں یہ بھی ذکر کیا گیا کہ عمران خان ایک متنازعہ شخصیت ہیں اور امریکی حکومت کسی نئے تنازعے کی متحمل نہیں ہو سکتی۔ پاکستان اور امریکہ کے تعلقات ہمیشہ خطے میں دیرپا امن کی ضمانت رہے ہیں اور امریکی حکومت کے لیے بہتر ہوگا کہ وہ بانی پی ٹی آئی سے دور رہے۔

مضمون میں یہ بات بھی کہی گئی کہ پاکستان اور امریکہ کے تعلقات ہمیشہ دیرینہ اور مشترکہ مفادات پر مبنی رہے ہیںاور عمران خان کی کسی قسم کی حمایت سے دو طرفہ تعلقات میں رخنہ آ سکتا ہے۔

آخر میں کہا گیا کہ عمران خان کی سیاست پاکستان کا اندرونی مسئلہ ہے اور امریکی حکومت کو اس میں مداخلت نہیں کرنی چاہیے۔