By پی ٹی آئی کی رہنما ڈاکٹر یاسمین راشد کا کہنا ہے ملک میں جمہوریت کا گلا گھونٹا اور لوگوں کی آواز بند کرنے کی کوشش جاری ہے۔
تفصیلات کے مطابق انسداد دہشت گردی عدالت لاہور میں پیشی کے موقع پر پاکستان تحریک انصاف کی رہنما اور سابق صوبائی وزیر ڈاکٹر یاسمین راشد نے صحافیوں کو مراسلہ تھما دیا، مراسلے میں انہوں نے اعلیٰ عدلیہ سے کہا کہ نوٹس لیا جائے ۔ جمہوریت کا گلا گھونٹا جارہا ہے، لوگوں کی آواز بند کی جارہی ہے۔ اس پر نظر ثانی کی جائے ۔
اس ظلم کو روکا جائے ورنہ پچھتاوے کے سوا کچھ نہیں ملے گا ۔ یہ ظلم وطن عزیز کو تباہی کے دہانے پر پہنچا دے گا ۔ ظلم اور جبر سے آپ عوام کے دلوں سے عمران خان کی محبت کو کبھی نہیں نکال سکتے ۔ عوام پہلے بھی بانی پی ٹی آئی کیساتھ تھی اور آج بھی ان کے ساتھ کھڑی ہے۔ ان کا کہنا تھا کہ تحریک انصاف کے کارکنوں نے جو ظلم برداشت کیا اس کی تاریخ میں کوئی مثال نہیں ملتی ۔
8 فروری کو لوگوں نے جم غفیر نے نکل کر دنیا کو بتا یا ہمارا لیڈر عمران خان ہے۔ پاکستان تحریک انصاف عمران خان کی حقیقی آزادی کے نعرے کیساتھ کھڑی تھی کھڑی ہے اور کھڑی رہے گی۔ سابق صوبائی وزیر صحت کا مزید کہنا تھا کہ فارم 47 کی حکومت جمہوریت کا گلا گھونٹ رہی ہے اس کا نقصان صرف پی ٹی آئی کو نہیں بلکہ ہر سیاسی جماعت کو ہو گا۔
تا ریخ گواہ ہےکسی کے ساتھ زیادتی کرنے والے کے ساتھ بھی آگے چل کر زیادتی ہو گی ۔ پرامن احتجاج جمہوریت کا حسن ہے ۔ پی ٹی آئی رہنما نے کہا کہ آئی ایم ایف کا بنایا ہوا بجٹ لوگوں سے زبردستی قبول کر انے کی کوشش کی جا رہی ہے ۔ فارم 47 والی حکومت پاکستان کے عوام کو قبول نہیں ۔ جعلی حکومت کو چاہیے کہ چوری کیا ہو ا مینڈیٹ واپس کرے او ر حکومت اصل حق دار کے حوالے کرے ۔
