By وفاقی دارالحکومت اسلام آباد سمیت پنجاب اور خیبر پختونخوا کے بیشتر علاقوں میں آج گرج چمک کے ساتھ بارش ہوگی۔
محکمہ موسمیات کے مطابق ملک کے بیشتر علاقوں میں آندھی، جھکڑ، طوفان اور گرج چمک کے ساتھ بارش کی پیش گوئی کی گئی ہے۔ آج وفاقی دارالحکومت اسلام آباد اور گرد و نواح میں مطلع جزوی ابر آلود رہنے کے علاوہ آندھی، جھکڑ چلنے اور گرج چمک کے ساتھ بارش ہونے کا امکان ہے۔ صوبہ خیبر پختونخوا کے بیشتر اضلاع میں آج مطلع جزوی طور پر ابر آلود رہے گا۔ تاہم وزیرستان، ڈیرہ اسماعیل خان، ٹانک، بنوں، کوہاٹ، خیبر، باجوڑ، چترال، سوات، دیر، کوہستان اور پشاور سمیت بیشتر علاقوں میں آندھی، جھکڑ چلنے اور گرج چمک کے ساتھ بارش متوقع ہے ۔ صوبہ پنجاب کے بیشتر بالائی اضلاع میں مطلع ابر آلود ر ہے گا، اس کے علاوہ مری، گلیات، راولپنڈی، اٹک، جہلم، چکوال، میانوالی، بھکر، منڈی بہاؤالدین، لاہور اور گوجرانوالہ میں بھی آندھی، جھکڑ چلنے اور گرج چمک کے ساتھ چند مقامات پر محکمہ موسمیات نے بارش کی پیش گوئی کی ہے ۔
پنجاب کے وسطی اور جنوبی اضلاع میں موسم گرم اور جھکڑ چلنے کا امکان ہے۔ جب کہ صوبہ بلوچستان اور سندھ کے بیشتر اضلاع میں موسم خشک اور گرم ر ہنے کا امکان ہے ۔ بالائی سندھ میں بھی آندھی اور جھکڑ چلنے کا امکان ظاہر کیا گیا ہے ۔ کشمیر اور گلگت بلتستان میں بھی مطلع جزوی طور پرابر آلود رہنے کے علاوہ چند مقامات پر تیز ہواؤں اور گرج چمک کے ساتھ بارش ہو گی۔ جب کہ کل بروز اتوار ملک کے بیشتر علاقوں میں موسم خشک جب کہ جنوبی ،وسطی علاقوں میں گرم رہے گا۔ تاہم بالائی خیبر پختونخوا اور کشمیر میں چند مقامات پر تیز ہواؤں اور گرج چمک کے ساتھ بارش کا امکان ہے ۔ گلگت بلتستان میں مطلع جزوی طورپر ابرآلود رہے گا۔
