By وفاقی وزیر داخلہ و چیئرمین پاکستان کرکٹ بورڈ(پی سی بی) محسن نقوی نے دو ٹوک الفاظ میں کہا ہے کہ چیمپئنز ٹرافی پاکستان میں ہی ہوگی۔
اور چیمپئنز ٹرافی کے حوالے سے ہماری تیاریاں جاری ہیں،کہیں ایک موقع پر بھی تیاری نہیں رکےگی۔ ان خیالات کا اظہار چیئرمین پاکستان کرکٹ بورڈ(پی سی بی) محسن نقوی نے کراچی میں قائم حنیف محمد ہائی پرفارمنس سینٹر اور متصل اوول کرکٹ گراؤنڈ کے دورے کے موقع پر میڈیا سے غیر رسمی گفتگو کرتے ہوئے کیا۔ اس موقع پر ان کے ہمراہ پاکستان کرکٹ بورڈ کے چیف آپریٹنگ آفیسر سلیمان نصیر اور نیشنل اسٹیڈیم کے جنرل منیجر ارشد خان بھی موجود تھے۔ چیئرمین پاکستان کرکٹ بورڈ(پی سی بی) محسن نقوی کا کہنا تھا کہ بھار تی کرکٹ ٹیم کے پاکستان میں چیمپئنز ٹرافی میں نہ آنے کی کوئی وجہ نہیں ہے، نہ ہی چیمپئنزٹرافی پاکستان میں نہ ہونےکی کوئی وجہ ہے، ہائبرڈ ماڈل کی کوئی بات نہیں ہے، ہم نےساری ٹیموں کو شیڈول بھیج دیا ہے تمام ٹیمیں پاکستان آئیں گی، بھارت پروپیگنڈا کر رہا ہے تو آپ لوگ بھی کریں۔ محسن نقوی کا کہنا تھا کہ پوری آٹھ کی آٹھ ٹیمیں پاکستان آئیں گی۔
نیشنل سٹیڈیم میں کام چیمپئنز ٹرافی سے قبل پایہ تکمیل تک پہنچا ئیں گے، دن رات یہیں بیٹھ جائیں گے، سٹیڈیم کے ترقیاتی کام کے لیے انٹرنیشنل کنسلٹنٹ رکھے ہیں۔ چیئرمین پاکستان کرکٹ بورڈکا کہنا تھا کہ کل صبح انگلینڈ سیریز کے لیے قومی کرکٹ ٹیم کا اعلان ہوگا۔ ان کا مزید کہنا تھا کہ ویسٹ انڈیز سے ویمن ٹیم جیتا ہوا میچ ہار گئی ، ان کی شکست کا دکھ ہے، ویمن ٹیم پر ہمیں ابھی بہت کام کرنا ہے، ویمن ٹیم کے لیے بھی غیر ملکی کوچ تلاش کیا جارہا ہے، قومی خواتین کرکٹرز کے لیے بھی ویسے ہی اقدامات ہوں گے جیسے مینز کے لیے ہوئے، کرکٹ کا پیسا کرکٹ پر لگےگا، یہ بینکوں میں نہیں رکھا جائےگا۔انہوں نے کہا کہ ایف آئی والا معاملہ اتنا بڑا نہیں، وہ ادارہ بھی میرے ماتحت ہے، جو ہوگا اندرونی طور پر حل کریں گے۔
