By اسلام آبادہائی کورٹ نے وفاقی دارالحکومت میں نان، روٹی کی قیمتوں میں کمی کا نوٹیفکیشن معطل کر دیا۔
عدالت کی جانب سے اسلام آباد میں نان، روٹی کی قیمتوں میں کمی کا نوٹیفکیشن معطل کرتے ریمارکس دیے کہ روٹی کی قیمتوں میں کمی کا نوٹیفکیشن آئندہ سماعت 6 مئی تک معطل رہے گا۔ عدالت کے جج جسٹس طارق محمود جہانگیری نے نان بائی ویلفیئر ایسوسی ایشن کے صدر کی درخواست پر سماعت کی۔ عدالت میں درخواست گزار کے وکیل عمر اعجاز گیلانی اور ڈسٹرکٹ انتظامیہ کے نمائندے پیش ہوئے۔ نمائندہ ضلعی انتظامیہ نے عدالت کو بتایا کہ قانون میں ترمیم کی گئی تھی، ڈی سی اوز کو اختیار دیا گیا تھا۔ بیرسٹر عمر اعجاز گیلانی نے موقف کہا کہ فیڈرل پرائس کنٹرول وزیراعظم کی نگرانی میں تھی۔
نمائندہ ضلعی انتظامیہ نے موقف میں کہا کہ کنٹرولر جنرل پرائسز اینڈ سپلائزز کو وفاقی حکومت مقرر کرے گی، اسسٹنٹ کنٹرولر کو حکومت کا مجاز افسر مقرر کرے گا، جبکہ کنٹرولر جنرل کو قیمتوں کو تعین کرنے کا اختیار دیا گیا ہے۔ درخواست کے وکیل بیرسٹر عمر اعجازگیلانی نے دلائل دیتے ہوئے کہا کہ کنٹرولر جنرل کی پاور سیکشن تھری کے تحت نہیں جس کا نوٹیفکیشن جاری کیا گیا۔ عدالت نے استفسار کرتے ہوئے کہا کہ یہ بتائیں پنجاب میں 120 گرام کی روٹی25 روہے میں ہے جس پر نمائندہ ضلعی حکومت نےبتایا کہ وہ صوبائی حکومت ہے۔ یہاں آٹا مہنگا اور کرایہ بہت زیادہ ہے۔
نمائندہ ضلعی حکومت نے عدالت سے درخواست کی کہ متعلقہ افسر موجود نہیں، پیراوائز کمنٹس دے دیتے ہیں، مناسب وقت دے دیں۔جسٹس طارق محمود جہانگیری نے ریمارکس دیے کہ تندور والوں سے پوچھا کہ آٹا کتنے کا آ رہا ہے کہ لوگوں کو خوش کرنے کے لیے آرڈر جاری کر دیا۔عدالت نے آئندہ سماعت تک نوٹیفکیشن معطل کرنے کا حکم دے دیا۔عدالت نے ہدایت کی کہ آئندہ سماعت پر فریقین تفصیلی جواب عدالت میں جمع کرائیں۔بعد ازاں عدالت نے سماعت 6 مئی تک ملتوی کردی۔
خیال رہے کہ16 اپریل کو وفاق میں بھی روٹی کی نئی قیمت 16روپے جبکہ نان کی قیمت 20روپے مقررکی گئی تھی جس کا ضلعی انتظامیہ اسلام آباد کی جانب سے نئی قیمتوں کا نوٹیفکیشن جاری کیا گیا تھا۔نوٹیفکیشن کے مطابق 120گرام فی نان کی قیمت 20روپے ہوگی، نئی قیمتوں کا اطلاق کر دیا گیا تھا۔ وفاقی حکومت نے ڈی سی اسلام آباد نے تمام اسسٹنٹ کمشنرز اور پرائس کنٹرول مجسٹریٹس کو نئی قیمتوں کا اطلاق یقینی بنانے کی ہدایت کی تھی ۔
