By اب انسٹاگرام پر عریاں تصاویر اور ویڈیوز کو چھپانا ممکن ہوگا۔
سوشل میڈیا پلیٹ فارم انسٹاگرام پر عریاں تصاویر اور ویڈیوز کو چھپانے یا Blurrکرنے کے فیچر کی آزمائش شروع ہوگئی۔انسٹاگرام نے ایک بلاگ پوسٹ میں نیا فیچر متعارف کروانے کی تصدیق کر دی ہے۔انسٹاگرام کے مطابق نیوڈٹی پروٹیکشن فیچر کی آزمائش شروع کر دی گئی جس کے تحت نامناسب مواد کو چھپایا جائیگا۔اس فیچر کے تحت انسٹاگرام کا مصنوعی ذہانت پر مبنی فیچر از خود عریاں تصاویر اور ویڈیوز کو براہ راست انباکس میں بھیجے جانے کے بعد چھپا دے گایا انہیں Blurrکر دے گا۔
یعنی جیسے ہی کوئی صارف دوسرے صارف کو فحش ویڈیوز یا تصاویر بھیجے گا تو انسٹاگرام کا اے آئی سسٹم مرد و خواتین کے جنسی اعضا کی شناخت کے بعد ایسی ویڈیوز اور تصاویر کو بلر کردے گا۔ فیچر کے تحت ویڈیوز اور تصاویر کو ڈیلیٹ نہیں کیا جائے گا بلکہ انہیں انتباہ کے طور پر چھپا دیا جائے گا یا انہیں بلر کردیا جائے گا، جس کے بعد صارف مذکورہ ویڈیو یا تصویر پر کلک کرکے اسے درست طریقے سے دیکھنے کے اہل ہوجائے گا۔ مذکورہ فیچر کی آزمائش خصوصی طور پر نوعمر صارفین کے تحفظ کو یقینی بنانا ہے کیوں کہ انسٹاگرام 18 سال سے کم عمر صارفین میں بھی مقبول ہے اور دیکھا گیا ہے کہ ایسے کم عمر صارفین کو فحش مواد انباکس میں زیادہ بھیجا جاتا ہے۔ انسٹاگرام سمیت دیگر ایپلی کیشنز اور ویب سائٹس کو بھی کم عمر افراد کو جنسی مواد سے محفوظ رکھنے کے اقدامات کا مطالبہ کیا جاتا رہا ہے اور مختلف پلیٹ فارمز مختلف اوقات میں نوعمر صارفین کے تحفظ کے لیے فیچرز پیش کرتے رہے ہیں۔
