شیر افضل مروت کے الزامات پر سلمان اکرم راجہ کا ردِعمل آگیا

پاکستان تحریک انصاف کے سیکرٹری جنرل سلمان اکرم راجہ کا شیر افضل مروت کے الزامات پر ردِعمل آگیا۔

تفصیلات کے مطابق شیر افضل مروت نے اپنے ایک بیان میں سلمان اکرم راجہ کو اپنے پارٹی سے نکالے جانے کا ذمہ دار قرار دیا۔ جس پر سلمان اکرم راجہ نے انسداد دہشتگردی عدالت کے باہر میڈیا سے گفتگو کرتے ہوئے کہا کہ پارٹی میں کوئی لڑائی نہیں ہے۔ عمران خان کی قیادت میں سب متحد ہیں۔

مزید پڑھیں: عمران خان اگر کہیں کہ شکل نہ دکھائو تو میں ملک چھوڑ دوں گا، شیر افضل مروت

ایک اور سوال کے جواب میں انہوں نے کہا کہ اختلافات کی خبریں محض میڈیا کی پیدا کردہ ہیں، جو معمولی باتوں کو بڑھا چڑھا کر پیش کرتا ہے۔ انہوں نے کہا کہ بیک ڈور رابطوں کے بارے میں مجھے کوئی علم نہیں ہے۔ عمران خان واضح طور پر کہہ چکے ہیں کہ وہ کسی ڈیل کے نتیجے میں باہر نہیں آئیں گے۔

انہوں نے انکشاف کیا کہ عمران خان کو بنی گالہ جیسی آفرز ہوئیں تاہم انہوں نے مسترد کر دیں۔ عمران خان صرف آئین و قانون کی بالادستی کیلئے جیل میں ہیں۔انہوں  نے کہا کہ اپوزیشن جماعتوں کے اتحاد پر خوشی ہے، پوری قوم بھی یہی چاہتی ہے۔

صحافی نے جب شیر افضل مروت سے متعلق سوال کیا تو انہوں نے کہا کہ شیر افضل مروت خود جانتے ہیں کہ انہیں کیوں نکالا گیا۔ وہ بس معصومیت کا اظہار کر رہے ہیں، یہ فیصلہ عمران خان کا ہے اور وہ کسی ٹھوس وجہ کے بغیر فیصلہ نہیں کرتے۔