خیبر پختونخوا حکومت نے ’دستک ‘ پلیٹ فارم کے تحت موٹر وہیکل آٹومیشن سسٹم کا آغاز کر دیا۔ اس نظام کے ذریعے گاڑیوں کی رجسٹریشن، فیس کی ادائیگی، ملکیت کی منتقلی، ٹیکس کی وصولی اور یونیورسل نمبر پلیٹس جیسے تمام معاملات ڈیجیٹل طریقے سے انجام دیے جائیں گے۔
اس سسٹم کا افتتاح وزیر اعلیٰ خیبرپختونخوا علی امین خان گنڈاپور نے وزیراعلیٰ ہاؤس میں منعقدہ تقریب میں کیا۔ اس موقع پر صوبائی اسمبلی کے اسپیکر، صوبائی کابینہ کے اراکین، ایکسائز محکمے کے افسران اور دیگر معزز شخصیات بھی موجود تھیں۔ وزیر اعلیٰ نے اس جدید نظام کا باقاعدہ افتتاح کرتے ہوئے کہا کہ یہ اقدام صوبے میں ڈیجیٹل تبدیلی کی جانب ایک اہم قدم ہے۔ اس سسٹم کا تجرباتی آغاز ستمبر 2023 میں کیا گیا تھا، جس کے تحت 13,229 گاڑیوں کی رجسٹریشن، 71,654 واؤچرز جاری کیے گئے اور 6,437 گاڑیوں کی ملکیت کی منتقلی کے عمل کو مکمل کیا گیا۔
اس نظام کے ذریعے صوبائی حکومت کو 28 کروڑ روپے سے زائد کی آمدنی حاصل ہوئی جبکہ 13,738 گاڑیوں کو یونیورسل نمبر پلیٹس جاری کی گئیں۔ اب اس سسٹم کو پورے صوبے میں مکمل طور پر نافذ کر دیا گیا ہے۔ اس جدید نظام کی بدولت شہریوں کو گاڑیوں کی رجسٹریشن، فیس کی ادائیگی اور یونیورسل نمبر پلیٹس کے حصول کے لیے دفاتر کے چکر لگانے کی ضرورت نہیں رہے گی۔ اب یہ تمام خدمات آن لائن طریقے سے گھر بیٹھے حاصل کی جا سکیں گی۔
اس کے علاوہ اس اقدام سے گاڑیوں کی چوری اور ان کے غلط استعمال کو روکنے میں بھی مدد ملے گی۔وزیر اعلیٰ علی امین خان گنڈاپور نے تقریب سے خطاب کرتے ہوئے کہا کہ یہ خوش آئند ہے کہ ہم ڈیجیٹل تبدیلی کی جانب تیزی سے بڑھ رہے ہیں۔ انہوں نے کہا کہ ڈیجیٹلائزیشن کے ذریعے سرکاری امور میں شفافیت، کرپشن کا خاتمہ اور محکموں کی کارکردگی میں بہتری آئے گی۔ انہوں نے مزید کہا کہ حکومت نے اپنے وسائل کا دانشمندانہ استعمال کرتے ہوئے آمدن میں 49 فیصد اضافہ کیا ہے، جبکہ صحت کارڈ کے ذریعے سالانہ 11 ارب روپے کی بچت کی جا رہی ہے۔
وزیر اعلیٰ نے منشیات کے خاتمے کے لیے جدید ٹیکنالوجی کے استعمال پر بھی زور دیا اور عوام سے اپیل کی کہ وہ ایکسائز محکمے کے اہلکاروں کے ساتھ تعاون کریں تاکہ اس سنگین مسئلے کا خاتمہ ممکن ہو سکے۔ انہوں نے کہا کہ اگر ہم مل کر کام کریں تو کوئی بھی چیلنج ایسا نہیں ہے جسے ہم حل نہ کر سکیں۔یہ جدید نظام نہ صرف شہریوں کے لیے سہولت کا باعث بنے گا بلکہ صوبائی حکومت کے لیے آمدن میں اضافے کا ذریعہ بھی ثابت ہوگا۔
By 
