عمران خان اگر کہیں کہ شکل نہ دکھائو تو میں ملک چھوڑ دوں گا، شیر افضل مروت

رکن قومی اسمبلی شیر افضل مروت نے کہا ہے کہ عمران خان اگر کہیں کہ شکل نہ دکھائو تو میں ملک چھوڑ دوں گا۔

میڈیا سے گفتگو کرتے ہوئے شیر افضل مروت نے کہا کہ میں صوابی جلسے میں مہمان کے طور پر گیا ہوا تھا۔ان کا کہنا تھا کہ عمران خان کو ہر بات ٹھیک نہیں بتائی جاتی، کان بھرے جاتے ہیں، یہ وزارتیں اور قائمہ کمیٹیاں لینے عمران خان کے پاس جاتے ہیں یا پھر کسی کو بنانے اور گرانے کیلئے ان کے پاس جاتے ہیں۔

مزید پڑھیں: بشریٰ بی بی عمران خان کیساتھ ہی جیل سے باہر نکلیں گی: ترجمان مشال یوسفزئی

شیر افضل مروت نے کہا کہ پارٹی فنڈز اور وکلا کو فیس دینے کے آڈٹ کا مطالبہ کیا ، ماضی میں پارٹی ٹکٹ بیچنے کا الزام بھی لگایا گیا ،اس کا آڈٹ ہونا چاہئے۔ پی ٹی آئی میں اجارہ داری ہے ، اس کا احتساب ہونا چاہئے۔عمران خان نے کہا کہ اسمبلی اسے استعفیٰ دو تو ایک منٹ نہیں لگائوں گااور اگر کہیں گے کہ شکل نہ دکھائو تو ملک چھوڑ دوں گا۔

یاد رہے کہ گزشتہ دنوں عمران خان کے حکم پر شیر افضل مروت کوپارٹی ڈسپلن کی خلاف ورزی پر تحریک انصاف سے نکال دیا گیا تھا، جس کے جواب میں شیر افضل مروت نے سوشل میڈیا پر طویل تحریر لکھی تھی ، جس میں ان کا کہنا تھا کہ پارٹی اگر میرے متعلق اپنے فیصلے پر خود نظر ثانی کرے تو ٹھیک ہے ورنہ میں اپنے لیے کوئی رعایت نہیں مانگوں گا۔