جماعت اسلامی پاکستان کے امیر حافظ نعیم الرحمان نے حکومت پر شدید تنقید کرتے ہوئے کہا ہے کہ غلام ذہن حکومت نے عالمی مالیاتی ادارہ (آئی ایم ایف) کو عدالتوں اور اداروں تک بھی رسائی دے دی ہے۔
تفصیلات کے مطابق امیر جماعت اسلامی حافظ نعیم الرحمان نے منصورہ میں پریس کانفرنس کے دوران کہا کہ ترکیے کے صدر طیب اردوان کو پاکستان میں خوش آمدید کہتے ہیں، امید ہے دونوں ممالک غزہ میں امن کے لیے جان دار کردار ادا کریں گے۔
انہوں نے کہا کہ غزہ پر اسلامی اور فلسطین کے حامی ممالک کی سربراہی کانفرنس بلائی جائے، ٹرمپ غزہ خالی کرانے کا بیان غیرسنجیدگی اور قبضہ گیروں کی طرح جاری کر رہے ہیں۔
حافظ نعیم الرحمان کا کہنا تھا کہ غلام ذہن حکومت نے آئی ایم ایف کو عدالتوں اور اداروں تک بھی رسائی دے دی ہے، عالمی مالیاتی ادارے کے وفد کی چیف جسٹس سے ملاقات قومی وقار اور آزادی کے منافی ہے۔
ان کا کہنا تھا کہ چچا بھتیجی اشتہار دے کر مہنگائی کم کرنے میں مصروف ہیں لیکن زمینی حقائق قطعی مختلف ہیں، خیبرپختونخوا (کے پی) اور بلوچستان بدامنی کی آگ میں جل رہے ہیں۔
امیر جماعت اسلامی نے کہا کہ لوگوں کو اٹھا لیا جاتا ہے، لاپتا افراد کا مسئلہ حل نہیں ہو رہا، ملک کو بحرانی صورت حال سے نکالنا ہے تو آئین و قانون کی بالاستی قائم کرنا ہوگی۔
By 
