ملک کے مختلف حصوں میں آج بارش اور پہاڑوں پر برفباری کا امکان

ملک کے مختلف حصوں میں آج بھی بارش اور پہاڑوں پر برفباری کا امکان ہے۔

محکمہ موسمیات کے مطابق ملک کے بیشتر علاقوں میں موسم سرد اور خشک رہے گا تاہم گِلگت بلتستان میں چند مقامات پر بارش اور برف باری کا امکان ہے،  آزاد کشمیر کے چند مقامات پربھی ہلکی بارش اوربرف باری کا امکان ہے جبکہ چترال کے بھی چند مقامات پر بارش اور برف باری ہوسکتی ہے۔

محکمہ موسمیات کے مطابق وفاقی دارالحکومت اسلام آباد،بلوچستان، پنجاب اور سندھ کے بیشتر اضلاع میں بھی سردی کی شدت برقرار رہے گی۔

اسلام آباد، راولپنڈی اور مری سمیت ملک کے مختلف حصوں میں گزشتہ روز ہلکی بارش اور پہاڑوں پر برفباری ہوئی جس کے باعث سردی کی شدت میں اضافہ ہو گیا، سب سے زیادہ بارش خیبر پختونخوا کے علاقے دیر میں 15 ملی میٹر ریکارڈ کی گئی۔ کالام میں 12، بالاکوٹ میں 06، مالم جبہ میں 04، چترال میں ایک ملی میٹر بارش ہوئی،مری میں 03 اور اسلام آباد میں ایک ملی میٹر بارش ریکارڈ کی گئی۔

یہ بھی پڑھیں : پاکستان سٹاک ایکسچینج میں کاروبار کے آغاز پر تیزی، ڈالر سستا

گلگت بلتستان کے علاقے استور میں 02اور بگروٹ میں ایک ملی میٹر بارش ہوئی،کالام میں 05 انچ اور استور میں 02 انچ برفباری ہوئی، گزشتہ روز کم سے کم درجہ حرارت لہہ میں منفی 07 ڈگری سینٹی گریڈ ریکارڈ کیا گیا جبکہ پارا چنار میں منفی 04، بگروٹ میں منفی 03، مالم جبکہ اور زیارت میں منفی 02 ڈگری سینٹی گریڈ ریکارڈ کیا گیا۔

لاہور کی فضا میں خنکی برقرار ہے اوردرجہ حرارت 15 ڈگری سینٹی گریڈ ریکارڈ کیا گیا ہے،آئندہ چوبیس گھنٹوں کے دوران لاہور میں بارش برسنے کا کوئی امکان موجود نہیں ہے۔

دوسری طرف لاہور میں ائیر کوالٹی انڈیکس کی مجموعی شرح 181 ریکارڈ کی گئی ہے،لاہور آلودہ شہروں میں پہلے نمبر پر براجمان ہے۔