By باجوڑ میں بم دھماکہ، سیکیورٹی فورسز کا ایک اہلکار شہید اور دوسرا زخمی ہوگیا۔
خیبرپختونخوا کے ضلع باجوڑ کے علاقے ماموند میں ریموٹ کنٹرول بم دھماکے میں اے ایس آئی بخت زادہ شہید جبکہ پولیس اہلکار احسان اللہ زخمی ہو گیا۔ ریسکیو 1122 کی ٹیم نے اطلاع ملنے پر بروقت کارروائی کرتے ہوئے موقع پر پہنچ کر زخمی کو ابتدائی طبی امداد فراہم کی اور ہسپتال منتقل کر دیا۔ وزیر اعلی خیبر پختونخوا علی امین گنڈاپور نے دھماکے کی مذمت کرتے ہوئے واقعے میں ایک پولیس اہلکار کی شہادت پر افسوس کا اظہار کیا۔ انہوں نے شہید اہلکار کے اہل خانہ سے تعزیت اور دلی ہمدردی کا اظہار کرتے ہوئے شہید کے بلندی درجات اور پسماندگان کے لیے صبر جمیل کی دعا کی۔
وزیر اعلیٰ خیبر پختونخوا نے واقعے میں زخمی پولیس اہلکار کی جلد صحت یابی کے لیے نیک خواہشات کا اظہار بھی کیا۔ علی امین گنڈاپور نے پولیس کے اعلیٰ حکام سے واقعے کی رپورٹ طلب کرتے ہوئے واقعے میں ملوث عناصر کی گرفتاری کے لیے کاروائی عمل میں لانے کی ہدایت کردی۔ انہوں نے شہید اہلکار کے اہل خانہ کو شہدا پیکج دینے کا اعلان کیا اور متعلقہ حکام کو شہید کے اہل خانہ کو شہدا پیکج کے تحت امداد کی فراہمی کے لیے اقدامات کی ہدایت بھی کردی۔ اپنے بیان میں وزیر اعلیٰ خیبر پختونخوا نے کہا کہ اس طرح کے بزدلانہ واقعات سے پولیس کے حوصلے پست نہیں ہوں گے اور صوبائی حکومت شہید کے اہل خانہ کو تنہا نہیں چھوڑے گی۔ انہوں نے کہا کہ شہید کے اہل خانہ کی ہر ممکن معاونت کی جائے گی۔
پاک فوج کی ڈیرہ اسمٰعیل خان میں کارروائی، 8 دہشتگرہلاک
دوسری جانب خیبرپختونخوا کے ضلع ڈیرہ اسمٰعیل خان میں سیکیورٹی فورسز کی جانب سے دہشت گردوں کی موجودگی کی اطلاع پر آپریشن کے دوران فائرنگ کے تبادلے میں 8 دہشت گرد ہلاک ہو گئے جبکہ بلوچستان اور شمالی وزیرستان میں بھی سیکیورٹی کی کارروائیوں میں 4 دہشت گرد مارے گئے۔آئی ایس پی آر کی جانب سے جاری بیان میں بتایا گیا کہ 5 اپریل کو سیکیورٹی فورسز نے دہشت گردوں کی موجودگی کی اطلاع پر ڈیرہ اسمٰعیل خان میں انٹیلی جنس کی بنیاد پر آپریشن کیا۔آئی ایس پی آر کے مطابق آپریشن کے دوران شدید فائرنگ کے تبادلے میں 8 دہشت گرد مارے گئے۔آئی ایس پی آر نے بتایا کہ مارے گئے دہشت گرد سیکیورٹی فورسز کے خلاف دہشت گردی کی متعدد کارروائیوں اور معصوم شہریوں کی ٹارگٹ کلنگ میں سرگرم رہے، ہلاک دہشت گردوں سے اسلحہ، گولہ بارود اور دھماکا خیز مواد بھی برآمد ہوا ہے۔
