لاہور: پنجاب بھر میں دہشت گردی کے خدشات کے پیش نظر سی ٹی ڈی نے مختلف شہروں میں 143 انٹیلی جنس بیسڈ آپریشنز (IBOs) کی کارروائیاں کی ہیں، جس کے نتیجے میں 15 دہشت گرد گرفتار ہوئے ہیں۔
ترجمان سی ٹی ڈی کے مطابق یہ آپریشن لاہور، سیالکوٹ، گجرات، اٹک، سرگودھا، بہاولپور، جھنگ، میانوالی، چنیوٹ اور اٹک میں کیے گئے ہیں۔ لاہور سے ایک خطرناک دہشت گرد کو گرفتار کرلیا گیا ہے جن کا تعلق شمالی وزیرستان سے بتایا جاتا ہے۔ ترجمان کا کہنا ہے کہ دہشت گرد کا نام فتنہ الخوارج بتایا گیا ہے۔ اس کے علاوہ گرفتار شدہ دہشت گردوں سے دھماکہ خیز مواد، آئی ای ڈی بم، 1 ڈیٹونیٹر، 6 حفاظتی فیوز، 18 فٹ تار، پمفلیٹ اور نقدی برآمد کی گئی ہے۔ سی ٹی ڈی کے ترجمان نے بتایا کہ گرفتار دہشت گردوں کی شناخت مدثر خان، سجاد احمد، عاشق، اجمل خان، عمیر اقبال، محمد اعجاز، سہیل احمد، عیسی خان وغیرہ کے طور پر ہوئی ہے۔
دہشت گرد مختلف مقامات پر کارروائیاں کر کے عوام میں خوف و ہراس پھیلانا چاہتے تھے، تاہم سی ٹی ڈی کی بروقت کارروائی سے ان کے منصوبے ناکام ہو گئے۔
سی ٹی ڈی حکام نے مزید بتایا کہ رواں ہفتے کے دوران 1498 کومبنگ آپریشنز کیے گئے، جن میں 556 مشتبہ افراد کو گرفتار کیا گیا۔ ان آپریشنز میں 64511 افراد سے پوچھ گچھ بھی کی گئی۔ حکام کا کہنا ہے کہ سی ٹی ڈی محفوظ پنجاب کے ہدف پر عمل پیرا ہے اور دہشت گردی کے ناسور کو جڑ سے اکھاڑ پھینکنے کے لیے پرعزم ہے۔
By 
