سلیکشن کمیٹی چیمپئنز ٹرافی اسکواڈ کو ری ویو کررہی ہے، چیئرمین پی سی بی محسن نقوی کا انکشاف

چیئرمین پی سی بی محسن نقوی نے انکشاف کیا ہے کہ سلیکشن کمیٹی چیمپئنز ٹرافی اسکواڈ کو ری ویو کررہی ہے۔

قذافی اسٹیڈیم میں غیر رسمی بات چیت کرتے ہوئے انہوں نے کہا کہ سلیکشن کمیٹی کو اختیار ہے وہ چیمپئینز ٹرافی کے قومی اسکواڈ میں تبدیلی کرتے ہیں یا نہیں۔

سلیکشن کمیٹی چیمپیئنز ٹرافی کا اسکواڈ ری ویو کر رہی ہے، خوشدل شاہ اور فہیم اشرف کو نیک نیتی سے اسکواڈ کا حصہ بنایا گیا۔

چیمپیئنز ٹرافی سے قبل چھکوں کو لیکر فخر زمان کا بڑا مطالبہ

اس موقع پر انہوں نے کرکٹ شائقین کو خوشخبری سناتے ہوئے کہا کہ دبئی کے لئے ویزے کا مسئلہ حل ہوگیا ہے، جس کے پاس میچ کا کارڈ یا ٹکٹ ہوگا اسے ویزا مل جائے گا۔

چیئرمین پی سی بی محسن نقوی کا کہنا تھا کہ دبئی جانے کے حوالے سے چارٹرڈ فلائٹس کے لیے پی آئی اے سے بات کریں گے۔ ان کا کہنا تھا کہ 16فروری کو چیمپئنز ٹرافی کی تقریب آئی سی سی کی آفیشل تقریب ہے، جس میں مختلف ممالک کے لوگوں کو مدعو کیا گیا ہے۔

انہوں نے اسلام آباد میں نیا اسٹیڈیم بنانے کا اعلان کرتے ہوئے کہا کہ اسلام آباد کے پر فضا مقام پر نیا اسٹیڈیم بنے گا۔