لاہور: وزیرداخلہ محسن نقوی کی واپسی، قذافی سٹیڈیم پہنچ گئے

لاہور: چئیرمین پی سی بی و وزیرداخلہ محسن نقوی نے علی الصبح قذافی سٹیڈیم کی افتتاحی تقریب کے انتظامات کا جائزہ لیا۔

اس موقع پر انہوں نے افتتاحی تقریب کے لئے شاندار انتظامات کی ہدایت دیتے ہوئے کہا کہ ایونٹ کو نئے قذافی سٹیڈیم کے شایان شان ہونا چاہیے۔

میڈیا نمائندوں کے مطابق محسن نقوی نے قوم کے ساتھ کیے گئے وعدے کو پورا کرنے پر اللہ تعالی کا شکر ادا کیا اور کہا کہ آج پاکستان کے لئے فخر کا مقام کہ قذافی سٹیڈیم ایک مرتبہ پھر انٹرنیشنل میچز کا مرکز بن جائے گا۔ انہوں نے مزید کہا کہ ریکارڈ مدت میں قذافی سٹیڈیم کی تعمیر نو کا کام مکمل کرنے کا کریڈٹ پوری ٹیم کو جاتا ہے۔

دنیائے کرکٹ کا خوبصورت ترین اور عالمی معیار کا قذافی سٹیڈیم ریکارڈ مدت میں مکمل ہوا ہے۔ شائقین کرکٹ اور کھلاڑی سٹیڈیم میں فراہم کردہ جدید سہولتوں سے محظوظ ہوں گے۔ وزیرداخلہ نے ورکرز، ایف ڈبلیو او، نیسپاک، کنٹریکٹر اور پی سی بی کا تہہ دل سے شکریہ ادا کیا۔

واضح رہے کہ آج نئے تعمیر کردہ قذافی سٹیڈیم کا باقاعدہ افتتاح وزیراعظم پاکستان محمد شہباز شریف کریں گے۔ افتتاحی تقریب میں عوام کا داخلہ مفت ہوگا، جہاں معروف سنگرز علی ظفر، عارف لوہار اور آئمہ بیگ پرفارم کریں گے۔ رنگا رنگ آتشبازی، لائٹس شو اور ڈھول کا شاندار مظاہرہ بھی کیا جائے گا۔