پی ٹی آئی رہنما ڈاکٹر عمر بابر کا انتقال ہوگیا

پی ٹی آئی رہنما اور بلوچستان میں پارٹی کے فعال کارکن ڈاکٹر عمر بابر کا اچانک دل کا دورہ پڑنے سے انتقال ہوگیا۔

ڈاکٹر عمر بابر پی ٹی آئی کی سٹینڈنگ کمیٹی احتساب اور ڈسپلن کے صوبائی ہیڈ کے طور پر خدمات انجام دے رہے تھے اور سابق ایڈیشنل چیف سیکرٹری بلوچستان بھی رہ چکے تھے۔

ڈاکٹر عمر بابر اپنے دفتر میں معمول کے کاموں میں مصروف تھے کہ اچانک انہیں دل کا دورہ پڑا۔ فوراً انہیں قریبی ہسپتال منتقل کیا گیا تاہم ان کی حالت سنبھال نہ سکی اور وہ رضائے الہٰی سے انتقال کر گئے۔

ان کی وفات کی خبر سے پی ٹی آئی رہنماؤں، کارکنوں اور ان کے عزیزوں میں گہرے رنج و غم کی لہر دوڑ گئی ہے۔ ڈاکٹر عمر بابر ایک محنتی اور باصلاحیت شخصیت کے مالک تھے، جنہوں نے اپنی زندگی کے کئی سال عوامی خدمت میں گزارے۔

ان کی سیاسی جدوجہد خاص طور پر بلوچستان میں پی ٹی آئی کی تنظیم سازی اور پارٹی کے فروغ میں بہت اہم رہی۔ انہوں نے پارٹی کی کامیابی کے لیے بھرپور محنت کی اور مختلف عہدوں پر رہ کر عوام کی خدمت کی۔

پی ٹی آئی رہنماؤں نے ڈاکٹر عمر بابر کی وفات پر گہرے دکھ کا اظہار کرتے ہوئے کہا کہ ان کی خدمات ہمیشہ یاد رکھی جائیں گی۔ پارٹی کے قائدین نے ان کی وفات کوسانحہ قرار دیا اور ان کے اہل خانہ سے تعزیت کا اظہار کیا۔