وفاقی حکومت کا اپریل سے بجلی کے نرخوں میں بڑی کمی کا پلان تیار

وفاقی حکومت کی جا نب سے  اپریل 2025 سے بجلی کے نرخوں میں بڑی کمی کا پلان تیار کرلیا گیا ۔

ذرائع  کے مطابق پاور ڈویژن اسٹیک ہولڈرز سے مشاورت کے بعد پلان وسط فروری تک تیار کرے گا، بجلی کے نرخوں میں واضح کمی کا پلان یکم اپریل 2025 سے نافذ کئے جانے کا امکان ہے۔

پاور ڈویژن ذرائع کے مطابق وزیر اعظم کی بجلی ٹیرف میں کمی کیلئے تمام اقدامات بروئے کار لانے کی ہدایت، اسحاق ڈار کی سربراہی میں ”ٹیرف میں کمی کیلئے قائم کمیٹی“ میں توسیع بھی کی گئی، کمیٹی نے ٹیرف میں کمی پلان کا بغور جائزہ پر کام کا آغاز بھی کر دیا۔

پاور ڈویژن ذرائع کا بتانا ہے کہ  پلان میں آئی پی پیز کے ساتھ نظر ثانی شدہ معاہدوں سے فی یونٹ متوقع ریلیف شامل ہے ، آئی پی پیز سے نظر ثانی معاہدوں سے 2 روپے فی یونٹ ریلیف متوقع ہے ، سرکاری پاور پلانٹس کے لئے ریٹرن آن ایکویٹی میں کمی کے زریعے بچت کا پلان شامل ہے۔

یہ بھی پڑھیں: 190 ملین پاؤنڈ کیس میں عمران حکومت کے ملوث ہونے  کا انکشاف، خفیہ دستاویز سامنے آگئی

ذرائع کے مطابق وفاقی و صوبائی ٹیکسوں میں کمی بجلی ٹیرف کیلئے پلان میں شامل ہے جبکہ ٹیکسوں میں کمی کے زریعے 3 روپے فی یونٹ تک کمی کا تخمینہ پلان میں شامل کیا گیا ہے ، حکومتی پلان کے تحت آئندہ ماہ حتمی مشاورت آئی ایم ایف وفد سے ہوگی۔

پاور ڈویژن ذرائع کا بتانا ہے کہ  آئی ایم ایف وفد کا موجودہ قرض پروگرام کے جائزہ کیلئے آئندہ ماہ پاکستان کا دورہ متوقع ہے ، پلان  پر عملدرآمد کیلئے صوبائی حکومتوں سے بھی مشاورت یقینی بنائے جائے گی،مجوزہ پلان پر آئی ایم ایف خدشات کو دور کرنے کیلئے فنانس ڈویژن کردار ادا کرے گا۔