مناسب قیمت نہ ملنے پر دلبرداشتہ کسان نے 50 من گوبھی  سبزی منڈی میں مفت تقسیم کردی

نارووال کی سبزی منڈی میں آڑھتی کی جانب سے گوبھی کی قیمت 2 روپے سے 5 روپے فی کلو لگانے پردلبرداشتہ کسان نے 50 من گوبھی عوام میں مفت میں تقسیم کردی۔

تفصیلات کے مطابق نارووال کی سبزی منڈی میں آڑھتی کی جانب سے گوبھی کی قیمت دو روپے سے پانچ روپے فی کلو لگانے پر کسان نے 50 من گوبھی لوگوں میں مفت میں تقسیم کردی۔ نارووال کے نواحی موضع صادق آباد میں کسان نے 50 من کے قریب پھول گوبھی لے کر سبزی منڈی پہنچا تو کئی آڑھتوں کے چکر کاٹنے پر بھی اسے 2 روپے فی کلو سے 5 روپے فی کلو سے زیادہ بولی نہ لگی۔

کسان نے دلبرداشتہ ہوکر منڈی میں گوبھی مفت تقسیم کردی۔ سبزی منڈی آئے شہری تھیلے بھر کر مفت میں گوبھی لے گئے۔ کسان کا کہنا تھا کہ 40 ہزار روپے فی ایکڑ ہمارا خرچہ آتا ہے، دو روپے فی کلو سے ہمارا منڈی تک آنے کا خرچہ نہیں نکلتا، ہم بچوں کی فیس ادا نہیں کر پا رہے۔

کسان کی جانب سے مفت تقسیم کیے جانے کا اعلان سن کر شہری بوریوں میں بھر کر گوبھی لے گئے۔