کراچی میں چینی کی فی کلو قیمت میں 20 روپے تک اضافہ ہو گیا، شہری پریشان، رمضان المبارک تک قیمت 170 روپے کلو تک پہنچنے کا خدشہ ہے ۔
تفصیلات کے مطابق شہر قائد کی مارکیٹوں میںرمضان کے آغاز سے قبل ہی سٹے باز سرگرم ہوگئے، چینی کی فی کلو نر خ 10 روز میں 20 روپے بڑھا دئیے ۔ شہری چینی 150 روپے فی کلو خرید اری پر مجبور ہیں ۔
چینی کی قیمت پر سٹے بازی ایک بار پھر عروج پر پہنچ گئی، دکاندار واٹس ایپ گروپس کے ذریعے من مانی قیمتیں طے کرنے لگے۔ رپورٹ کے مطابق کراچی میں 10 روز کے دوران چینی کی فی کلو قیمت میں 20 روپے تک اضافہ کیا گیا ۔
ڈیلر کہتے ہیں ایکسپورٹ کی آڑ میں اسمگلنگ اور سٹے بازی ہورہی ہے۔ دوسری طرف شوگر ڈیلرز نے رمضان المبارک تک فی کلو چینی 170 روپے کلو ہونے کا خدشہ ظاہر کردیا۔ ساتھ ہی کہا ہے کہ ایف آئی اے چھاپے مارے تو چینی ایک دن میں 10 روپے کلو سستی ہوسکتی ہے۔
ادھر لاہور کی مارکیٹوں میں بھی چینی کی قیمتیں بڑھ گئی ہیں ، ایک ہفتے میں نرخ فی کلو 12 روپے بڑھ گئے، 50 کلو والا تھیلا 600 روپے اضافے کے بعد 7 ہزار 400 روپے تک بیچا جانے لگا ۔
ہول سیل پر چینی کی فی کلو قیمت 136 سے بڑھ کر 148 روپے تک پہنچ گئی ہے جبکہ پرچون میں چینی 150روپے فی کلو بک رہی ہے۔