پی ٹی آئی احتجاج کی وجہ سے موٹر ویز بند کرنے سے کروڑوں کا نقصان ہونے کا انکشاف کیا گیا ہے۔
قومی اسمبلی میں وفاقی وزیر برائے مواصلات علیم خان نے نومبر 2024 میں تحریک انصاف کے احتجاج کی وجہ سے موٹر ویز بند ہونے سے نقصان کی تفصیلات جمع کرائیں۔
وفاقی وزیر مواصلات کی جانب سے جمع کرائی گئی تفصیلات کے مطابق پی ٹی آئی کے احتجاج کے پیش نظر موٹر وے ایم 2، ایم 3 اور ایم 4 کو 24 سے26 نومبرکو بند کیا گیا جس سے ٹول ریونیو کی مد میں 15 کروڑ 15 لاکھ روپے کا نقصان ہوا۔
ان کا کہنا تھا کہ موٹرویز کو امن و امان کی صورتحال کے پیش نظر بند کیا گیا تھا، قومی اسمبلی میں جمع کرائے گئے جواب میں علیم خان نے کہا کہ مصدقہ اطلاعات تھیں کہ مشتعل مظاہرین امن و امان کی صورتحال خراب کرنے اور املاک کو نقصان پہنچانے کا منصوبہ بنا چکے ہیں۔
ان کا کہنا تھا کہ عوام کے جان و مال کے تحفظ کے لیے موٹرویز کو مختلف مقامات سے بند کیا گیا۔