نومئی واقعات مقدمات میں علیمہ اور عظمیٰ کی ضمانتوں میں توسیع

لاہور: انسداد دہشتگردی کی عدالت نے جناح ہاؤس حملہ اور 5 اکتوبر کو جلاؤ گھیراؤ کے مقدمات میں پی ٹی آئی رہنماؤں علیمہ خان، عظمیٰ خان اور دیگر نامزد ملزمان کی عبوری ضمانتوں میں توسیع کر دی۔

لاہور کی انسداد دہشتگردی عدالت کے جج ارشد جاوید نے پی ٹی آئی رہنماؤں کے خلاف مختلف مقدمات کی سماعت کی۔ بانی پی ٹی آئی کی بہنیں علیمہ خان اور عظمیٰ خان عبوری ضمانت کی مدت ختم ہونے پر عدالت پیش ہوئیں۔ اس کے علاوہ پی ٹی آئی کے رہنما علی امتیاز اور ندیم عباس بارا بھی عدالت میں پیش ہو کر حاضری مکمل کرائی۔

مقدمے میں نامزد پی ٹی آئی کے سیکرٹری جنرل سلمان اکرم راجہ کی جانب سے حاضری معافی کی درخواست دائر کی گئی، جسے عدالت نے منظور کر لیا۔

عدالت نے تفتیشی افسر کو آئندہ سماعت پر تفتیش مکمل کر کے رپورٹ پیش کرنے کی ہدایت کی اور ملزمان کی عبوری ضمانتوں میں توسیع کرتے ہوئے درخواستوں پر مزید سماعت 15 فروری تک ملتوی کر دی۔
واضح رہے کہ ملزمان کے خلاف تھانہ اسلام پورہ، لاری اڈا اور تھانہ مستی گیٹ میں مقدمات درج ہیں۔