پاکستان کو بین الاقوامی انٹرنیٹ ٹریفک سے جوڑنے والی سب میرین کیبل AAE-1 میں فنی خرابی کے باعث نہ صرف پاکستان بلکہ کئی دوسرے ممالک میں بھی انٹرنیٹ سروسز عارضی طور پر سست روی کا شکار ہو گئیں۔ اس خرابی کی وجہ سے پی ٹی سی ایل کے صارفین کو براؤزنگ میں مشکلات کا سامنا ہے اور انٹرنیٹ کی رفتار میں کمی آئی ہے۔
پی ٹی اے کی تصدیق:
تفصیلات کے مطابق پاکستان ٹیلی کمیونیکیشن اتھارٹی (پی ٹی اے) نے اس خرابی کی تصدیق کرتے ہوئے کہا کہ یہ سب میرین کیبل قطر کے قریب میں واقع ہے، جہاں تکنیکی خرابی کی وجہ سے انٹرنیٹ کی ترسیل متاثر ہوئی ہے۔ پی ٹی سی ایل نے اپنے صارفین سے معذرت کرتے ہوئے کہا ہے کہ کیبل کی مرمت کے بعد انٹرنیٹ سروسز کی فراہمی میں تیزی آ جائے گی۔
جلد مسئلہ حل ہو جائے گا:عالمی ٹیمیں
پی ٹی اے کے مطابق، عالمی سطح پر کام کرنے والی ٹیمیں خرابی کو دور کرنے کیلئے کام کر رہی ہیں اور انہیں امید ہے کہ جلد ہی مسئلہ حل ہو جائے گا۔ پی ٹی اے نے اس بات کا بھی اعادہ کیا کہ وہ اس صورت حال کی مسلسل نگرانی کر رہا ہے اور صارفین کو وقتاً فوقتاً آگاہ کرتا رہے گا تاکہ وہ کسی بھی نئی پیشرفت سے باخبر رہیں۔
انٹرنیٹ سروسز کے حوالے سے شکایات موصول
اس خرابی کے اثرات نہ صرف پاکستان میں بلکہ دنیا کے کئی دوسرے ممالک میں بھی محسوس کئے گئے ہیں، جہاں انٹرنیٹ سروسز کی رفتار میں کمی آئی ہے۔ کئی دیگر ٹیلی کمیونیکیشن کمپنیوں اور براڈبینڈ سروس پرووائیڈرز کو بھی اس کیبل کی خرابی کی وجہ سے متاثر ہونے والی انٹرنیٹ سروسز کے حوالے سے شکایات موصول ہوئی ہیں۔
خرابی کی مرمت کیلئے عالمی ماہرین کی ٹیمیں کوشاں ہیں: پی ٹی اے
پی ٹی اے نے عوام کو یقین دہانی کرائی ہے کہ خرابی کی مرمت کے عمل میں تیزی لانے کے لیے عالمی سطح پر ماہرین کی ٹیمیں کوشاں ہیں اور صارفین کی سہولت کے لیے ہر ممکن اقدامات کیے جا رہے ہیں۔ انٹرنیٹ کی مکمل فراہمی کی حالت میں معمول کی صورتحال بحال ہونے کی امید ہے اور پی ٹی اے کی طرف سے باقاعدہ اپ ڈیٹس فراہم کی جاتی رہیں گی۔
By 
