پاکستان مارکیٹ میں تیزی، کے ایس ای 100 انڈیکس 1200 سے زائد پوائنٹس بڑھ گیا

کراچی: پاکستان اسٹاک ایکسچینج (پی ایس ایکس) میں مندی کا زور ٹوٹ گیا اور بینچ مارک کے ایس ای 100 انڈیکس میں 1200 سے زائد پوائنٹس کا اضافہ ریکارڈ کیا گیا۔ دوپہر 12 بجے، بینچ مارک انڈیکس 1,213.37 پوائنٹس یا 1.1 فیصد اضافے کے ساتھ 111,636.69 پوائنٹس پر جا پہنچا

آٹوموبائل اسمبلرز، سیمنٹ، کمرشل بینکوں، تیل و گیس کی تلاش کرنے والی کمپنیوں، او ایم سیز، بجلی کی پیداوار اور ریفائنریز جیسے اہم شعبوں میں خریداری دیکھی گئی۔ حبکو، پی ایس او، شیل، ایس این جی پی، ایم اے آر آئی، او جی ڈی سی، پی پی ایل، ایم ای بی ایل، ایم سی بی اور این بی پی سمیت مختلف کمپنیاں مثبت زون میں رہیں۔

اسٹاک ایکسچینج میں فروخت کے دباؤ کے بعد ایک بار پھر سرمایہ کاروں کی خریداری میں دلچسپی نظر آئی۔ یاد رہے کہ جمعرات کو پی ایس ایکس دباؤ میں رہا تھا اور سرحد پر سیکیورٹی کی صورتحال اور سال کے آخر میں پورٹ فولیو ایڈجسٹمنٹ کے خدشات کی وجہ سے منفی زون میں بند ہوا تھا۔ جمعرات کو بینچ مارک کے ایس ای 100 انڈیکس 1991.49 پوائنٹس یا 1.77 فیصد کی کمی کے ساتھ 110,423.32 پوائنٹس پر بند ہوا تھا۔
عالمی سطح پر، جمعہ کو ایشیائی اسٹاک میں اتار چڑھاؤ دیکھا گیا، جبکہ ڈالر مستحکم رہا اور ین پانچ ماہ کی کم ترین سطح کے قریب رکا۔

سرمایہ کار 2025 کی طرف دیکھ رہے ہیں جب فیڈرل ریزرو سے شرح سود میں محتاط کمی کی توقع کی جا رہی ہے۔ ایم ایس سی آئی کا جاپان کے علاوہ ایشیا پیسیفک شیئرز کا سب سے وسیع انڈیکس 574.88 پر معمولی اضافے کے ساتھ بند ہوا، اور جاپان کا نِکی انڈیکس 0.77 فیصد بڑھا۔

چین کا سی ایس آئی 300 انڈیکس ابتدائی ٹریڈنگ میں معمولی تبدیلی کے ساتھ رہا، جبکہ ہانگ کانگ کا ہینگ سینگ انڈیکس تعطیلات کے بعد 0.12 فیصد زیادہ رہا۔ سال کے آخری کاروباری دنوں میں سرمایہ کاروں کی توجہ 2025 پر مرکوز ہو گئی ہے، جہاں فیڈ کی پالیسی کا راستہ، ٹرمپ انتظامیہ کی پالیسیاں اور جیوپولیٹیکل خدشات اہم موضوعات ہیں۔