مائیکروسافٹ ونڈوز سسٹم کے ذریعے نیٹ ورک تک رسائی کیلئے سائبر حملوں کا خطرہ

مائیکروسافٹ استعمال کرنے والےصارفین کے اکائونٹس اور لاگ ان پاس ورڈز خطرے میں پڑ گئے، حساس ڈیٹا تک رسائی اور ڈیٹاچرانےکے لیے سائبر حملوں سے خبردار کرتے ہوئے نیشنل سائبر ایمرجنسی رسپانس ٹیم نے ایڈوائزری جاری کردی۔

ایڈوائزری کے مطابق مائیکرو سافٹ ونڈوز سسٹم کے ذریعے نیٹ ورک تک رسائی کے لیے سائبر حملوں کا خطرہ ہے ، ہیکرز نیٹ ورک اور حساس معلومات تک رسائی حاصل کر سکتے ہیں۔

نیشنل سائبر ایمرجنسی ریسپانس ٹیم نے کہا ہے کہ رسائی کے لیے ہیکرز کو کسی فائل کھولنے کی بھی ضرورت نہیں ہوتی، مائیکرو سافٹ نے ابھی تک مسئلے کے لیے کوئی آفیشل حل جاری نہیں کیا۔

یہ بھی پڑھیں : پاکستان میں پہلی مرتبہ ہاٹ ائیر بیلون لانچ کردیا گیا

ایڈوائزری کے مطابق لاگ ان پاسورڈز اور نیٹ ورکس تک رسائی سے پورے سسٹم کا کنٹرول حاصل کیا جا سکتا ہے، یہ ونڈوز 7 سے11 اور ونڈوز سرور 2022ء سمیت تمام ونڈوز ورژنز کو متاثر کر سکتا ہے۔

دوہرے حفاظتی نظام اور نیٹ ورک کی مضبوطی کی سفارش کرتے ہوئے ایڈوائزری میں کہا گیا ہے کہ فائروال، ورچوئل لوکل ایئر یا نیٹ ورک سے مخصوص معلومات کو محفوظ بنایا جا سکتا ہے۔

ایڈوائزری میں یو ایس بی، ای میل اٹیچمنٹ اور شیئر فولڈرز کے ذریعے مشکوک فائلز کو نہ کھولنے کا مشورہ دیا گیا ہے۔

یاد رہے کہ گزشتہ سال کے آخر میں نگران وفاقی حکومت نے پہلی نیشنل سائبر ایمرجنسی رسپانس ٹیم قائم کی تھی جس کا مقصد سائبر اسپیس، آن لائن ڈیٹا، آن لائن خرید و فروخت کا تحفظ یقینی بنانا ہے، سائبر کرائمز سے بچاؤ اور نگرانی کے لیے یہ بااختیار ادارہ ہے۔