اسلام آباد: سوشل میڈیا پر بدنیتی پر مبنی مہم، ملزمان کو نوٹسز جاری

اسلام آباد: آئی جی اسلام آباد نے سوشل میڈیا پر بدنیتی پر مبنی مہم چلانے والے ملزمان کو نوٹسز جاری کر دیے ہیں۔ نوٹسز صبغت اللہ ورک، محمد ارشد، عطاالرحمن، اظہر مشوانی، کومل آفریدی، عروسہ ندیم شاہ، اور ایم علی ملک کو جاری کیے گئے ہیں

جے آئی ٹی نے ان ملزمان کو 13 دسمبر کو طلب کیا ہے۔ ان پر الزام ہے کہ انہوں نے سوشل میڈیا پر بدنیتی پر مبنی مہم چلائی جس کے ذریعے پاکستان میں افراتفری اور انتشار پھیلایا گیا۔ وفاقی حکومت نے سوشل میڈیا پر جرائم کی روک تھام کے لیے پیکا ایکٹ 2016 کے سیکشن 30 کے تحت آئی جی پولیس کے ماتحت ایک مشترکہ تحقیقاتی ٹیم (جے آئی ٹی) تشکیل دی تھی۔

جے آئی ٹی ملزمان اور ان کے ساتھیوں کے پسِ پردہ مقاصد کا تعین کرنے کے لیے تحقیقات کر رہی ہے، اور مزید مجرموں کی شناخت کے لیے کارروائی کی جا رہی ہے۔ جے آئی ٹی کے پاس ان ملزمان کے خلاف ٹھوس شواہد موجود ہیں جو کہ ملک میں بدامنی اور انتشار پھیلانے کے لیے سوشل میڈیا پر پروپیگنڈا کر رہے تھے۔ اس تحقیقات کے ذریعے مزید ملزمان کے خلاف قابل اطلاق قوانین کے تحت کارروائی کی جا رہی ہے۔