پابندی اٹھنے کے بعد پی آئی اے کا یورپ فلائٹ آپریشن متاثر ہونے کا خدشہ

حال ہی میں پابندی اٹھنے کے بعد اب خدشہ پیدا ہو گیا ہے کہ پی آئی اے کا یورپ فلائٹ آپریشن متاثر ہو سکتا ہے۔

قومی ایئر لائن (پی آئی اے) کے شعبہ انجینئرنگ انتظامیہ کی مبینہ غفلت اور ناقص کارکردگی کے سبب پی آئی اے کے 34 کے فلیٹ میں 17 طیارے گراؤنڈ ہو چکے ہیں، جس کی وجہ سے یورپ فلائٹ آپریشن متاثر ہونے کا خدشہ ہے۔

ذرائع کے مطابق بوئنگ 777 کے 12 طیاروں میں سے 7 گراؤنڈ ہیں، ایئر بس 320 ساختہ 17 طیاروں میں سے 7 گراؤنڈ ہیں، جب کہ 5 اے ٹی آر طیاروں میں سے صرف 2 طیارےآپریشنز میں حصہ لے رہے ہیں۔

ذرائع  کا بتانا ہے کہ گراؤنڈ ہونے والے طیاروں میں زیادہ تر انجن، لینڈنگ گیئر، APU سمیت دیگر پرزہ جات نہ ہونے کی وجہ سے گراؤنڈ ہیں، جس سے قومی ایئر لائن کو کروڑوں ڈالر کے نقصان کا سامنا ہے۔

یہ بھی پڑھیں : عادل بازئی کو ڈی سیٹ کرنے کا فیصلہ کالعدم قرار ،  قومی اسمبلی کی رکنیت بحال

ذرائع کا کہنا ہے کہ پی آئی اے کے زیادہ تر طیارے کئی سال سے گراؤنڈ ہیں اور گراؤنڈ ہونے والے طیاروں کے زیادہ تر پرزہ جات دوسرے طیاروں میں استعمال کیے گئے۔

ذرائع کا مزید کہنا ہے کہ 777 طیارے گراؤنڈ ہونے کی وجہ سے پیرس کے لیے شروع ہونے والا فلائٹ آپریشن متاثر ہونے کا خدشہ ہے، یورپی سیفٹی ایجنسی ایاسا نے پابندی اٹھانے کے ساتھ قومی ایئر لائن کو واضح کیا ہے کہ یورپ آنے والے جہازوں کا سخت سافا انسپیکشن ہوگا اور سخت مانیٹر بھی کیا جائے گا۔

دوسری جانب پی آئی اے کے ترجمان نے ایک بیان میں کہا ہے کہ پیرس کے لیے آپریٹ ہونے والا جہاز تیار ہو گیا ہے۔