سابق برطانوی ڈپٹی وزیرِاعظم لارڈ جان پریسکاٹ انتقال کر گئے

برطانیہ کے سابق لیبر ڈپٹی وزیرِاعظم لارڈ جان پریسکاٹ 86 برس کی عمر میں  انتقال کر گئے۔

برطانوی میڈیا کی رپورٹ کے مطابق  لارڈ جان پریسکاٹ الزائمر کے مرض میں مبتلا تھے، لارڈ جان پریسکاٹ کی موت لواحقین کی موجودگی میں کیئر ہوم میں ہوئی۔

لارڈ جان پریسکاٹ کی موت پر تمام سیاسی جماعتوں کے رہنماؤں نے اظہارِ افسوس کیا ہے۔

برطانوی وزیرِ اعظم کیئر اسٹارمر نے افسوس کا اظہار کرتے ہوئے کہا کہ لارڈ پریسکاٹ لیبر کی تحریک میں ایک قد آور شخصیت تھے،  ماحولیات اور علاقائی مساوات کے لیے ان کی کاوشیں ہمیشہ یاد رکھی جائیں گی۔

یہ بھی پڑھیں : ایم جی پاکستان نے گاڑیوں کی قیمتوں میں خصوصی رعایت کا اعلان کردیا

سابق برطانوی وزیرِ اعظم ٹونی بلیئر نے کہا کہ لارڈ جان پریسکاٹ پُرعزم، وفادار اور غیر معمولی انسان تھے، برطانوی سیاست میں لارڈ جان پریسکاٹ جیسا کوئی نہیں تھا۔

برطانیہ کے سابق کنزرویٹیو وزیرِ اعظم ڈیوڈ کیمرون نے افسوس کا اظہار کرتے ہوئے کہا کہ لارڈ جان پریسکاٹ نے سیاست پر بہت اثر ڈالا ہے۔

واضح رہے کہ لارڈ جان پریسکاٹ تقریباً 40 برس کنگسٹن اپان ہل ایسٹ سے رکنِ پارلیمنٹ رہے۔