کراچی میں آئیڈیاز 2024 کی دفاعی نمائش، تعلیمی اداروں میں چھٹیوں کا امکان

کراچی میں آئیڈیاز 2024 کی دفاعی نمائش اور سیمینار کے انعقاد کے پیش نظر کراچی کے کچھ علاقوں میں 19 سے 22 نومبر 2024 تک اسکولوں میں چھٹی کا اعلان متوقع ہے۔

تفصیلات کے مطابق آئیڈیاز 2024 کی دفاعی نمائش کا افتتاح وزیراعظم پاکستان شہباز شریف کریں گے۔ یہ نمائش دفاعی ساز و سامان اور ہتھیاروں کی بین الاقوامی نمائش ہے، جس میں عالمی دفاعی صنعت کے ماہرین، حکام اور پالیسی ساز شامل ہوں گے۔ آئیڈیاز 2024 کے دوران ایکسپو سینٹر میں جدید اور روایتی دفاعی آلات، ہتھیاروں کے نظام اور گاڑیوں کی وسیع رینج کی نمائش کی جائے گی۔

مزید پڑھیں: لاہور اور ملتان میں ہیلتھ ایمرجنسی کا اعلان

اس ایونٹ میں مقامی اور بین الاقوامی نمائندے، سیکورٹی ماہرین اور دفاعی ٹیکنالوجی کی تازہ ترین اختراعات کی نمائش کرنے والے نمائش کنندگان بھی شریک ہوں گے۔ نمائش کی کامیابی اور اس کے حفاظتی انتظامات کو مدنظر رکھتے ہوئے کراچی کے شاہراہ فیصل اور حبیب ابراہیم رحمت اللہ روڈ کے ساتھ واقع اسکولوں میں 19 سے 22 نومبر تک تعطیلات متوقع ہیں۔

اگر اسکول ان علاقوں میں بند رہتے ہیں تو وہ 25 نومبر (پیر) کو دوبارہ کھلیں گے کیونکہ ہفتہ اور اتوار کو معمول کی دو ہفتہ وار چھٹیاں ہوں گی۔ اسکولوں کی بندش کے حوالے سے حتمی فیصلہ حکام سیکیورٹی پلان کا جائزہ لینے کے بعد کریں گے۔