پاک فضائیہ کے سربراہ ایئر چیف مارشل ظہیر احمد بابر سدھو کو بحرین کے اعلیٰ فوجی اعزاز بحرین میڈل فرسٹ کلاس سے نوازا گیا۔ یہ اعزاز برادر ممالک کے درمیان فوجی اور دفاعی تعاون کو فروغ دینے میں ان کی شاندار کاوشوں کے اعتراف میں دیا گیا۔
پاکستا ک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق ایوارڈ کی تقریب بحرین کے سخیر ایئر بیس پر ہوئی، جہاں مملکت بحرین کی اعلیٰ سول اور فوجی قیادت بھی موجود تھی۔ بحرین کے نائب فرمانروا شہزادہ سلمان بن حمد الخلیفہ نے ایئر چیف مارشل سدھو کو یہ ایوارڈ بحرین کے فرمانروا شاہ حمد بن عیسیٰ الخلیفہ کی جانب سے پیش کیا۔
بحرین انٹرنیشنل ایئر شو کے دوران ایئر چیف مارشل سدھو نے بحرین میڈل فرسٹ کلاس حاصل کرنے پر شکریہ ادا کیا۔ اس موقع پر بحرینی نائب فرمانروا نے پاک فضائیہ کے جے ایف 17 بلاک تھری لڑاکا طیاروں کی ایئر شو میں بھرپور شرکت پر ایئر چیف کا شکریہ ادا کیا۔
مزید برآں ایئر چیف نے بحرین کے اعلیٰ فوجی قیادت کے ساتھ ملاقاتیں کیں، جن میں بحرین ڈیفنس فورس کے کمانڈر انچیف فیلڈ مارشل شیخ خلیفہ بن احمد الخلیفہ سے بھی ملاقات شامل تھی۔ امریکی ایئر فورس سینٹرل کمانڈ کے کمانڈر لیفٹیننٹ جنرل ڈیرک فرانس کے ساتھ بھی ایک اہم ملاقات ہوئی، جس میں دونوں ممالک کے درمیان دوطرفہ تعاون کو مزید فروغ دینے کے عزم کا اظہار کیا گیا۔
آئی ایس پی آر کے مطابق امریکی کمانڈر نے پاکستان کی جانب سے علاقائی امن کے فروغ میں کی جانے والی کوششوں کی تعریف کی، اور مشترکہ تربیتی مشقوں اور فوجی تعاون کے شعبوں میں تعاون بڑھانے پر زور دیا۔
By 
