By رکن قومی اسمبلی و سینئر رہنما پاکستان تحریک انصاف (پی ٹی آئی) اسد قیصر نے کہا ہےکہ بانی پی ٹی آئی کیخلاف جتنے کیسز ہیں کمزور ہیں اس پر سزا ہونا ممکن نہیں اور ہمیں انصاف ملے گا۔
تفصیلات کے مطابق نجی ٹی وی کے پروگرام میں میزبان سے گفتگو کرتے ہوئے اسد قیصر کا کہنا تھا کہ عمران خان کے ساتھ ظلم ہو رہا ہے ، ہم فیصلہ کریں گے کہ جدوجہد کا کونسا طریقہ اپنا یا جائے اور ہم دیگر جماعتوں کو بھی جن کا جمہوریت پر یقین ہےجو ملک میں لاقانونیت کیخلاف آواز بلند کررہی ہیں ان کو اپنے ساتھ ملائیں گے اور ان کے ساتھ جلد بیٹھک بھی کریں گے۔
تحریک انصاف کے سینئر رہنما اسد قیصر نے کہا کہ نہیں لگتا کہ موجودہ مینڈیٹ چور حکومت جس طرح چل رہی ہے یہ اپنی مدت پوری نہیں کر پائے گی اس کا وقت زیادہ نظر نہیں آتا ۔ اس نے قانون سازی کے لیے جو طریقہ اپنایاہوا ہے وہ تمام تر اصولوں کی خلاف ورزی ہے ۔ہمارے لوگوں کو تنگ بلا وجہ کیا گیا ، چادر چار دیواری کے تقدس کو پامال کیا گیا ہے ان سب کی ویڈیوز آئیں گی۔
لوگوں کو پتہ چلے گا یہ سب چیزیں سامنے لا ئینگے تو حکومت چل نہیں سکے گی۔ اس وقت حکومت کی ساکھ عوام اور بین الاقوامی سطح پر بہت خراب ہوچکی ہے۔ ان کا کہنا تھا کہ سپریم کورٹ بار کے نئے منتخب صدر سے امید کرتے ہیں کہ وہ آزاد عدلیہ پر کسی قسم کا سمجھوتہ نہیں کریں گے۔ چوہدری اعجاز کی بیگم نے جس طرح پریس کانفرنس میں بتایا ہے مجھے بڑا افسوس ہوا کہ پاکستانی ادارے نے اس طرح کا سلوک کیا ۔
خاتون کو سر کے بالوں سے کھینچا گیا بچیوں سے بدتمیزی کی گئی۔میزبان کے اس سوال پر کہ سابق امریکی صدر ڈونلڈٹرمپ کے آنے سے کوئی توقع ہے اس پر اسد قیصر نے کہا کہ ان کی اپنی سیاست ہے ہم سمجھتے ہیں کہ آزاد قوم کی حیثیت سے ہماری حیثیت تسلیم کی جائے گی ہمیں اپنے ملک کے اندر اپنی پالیسیاں خود یکھنی ہوں گی۔ ہمیں اپنی جدوجہد پر اپنے اللہ پر یقین ہے اور ہم کوشش کریں گے ہم قانونی جدوجہد بھی کریں گے عوامی اسمبلی بھی لگائیں گے جتنے فورمز ہیں سب پر اپنی جدوجہد آگے بڑھائینگے۔
