By پاکستان میں ایپل کے مجاز ڈسٹری بیوٹر مرکنٹائل نے باضابطہ طور پر آئی فون 16 سیریز متعارف کروا دی۔
یہ نئی سیریز اب جاز کے ذریعے پیشگی آرڈر کے لیے دستیاب ہے، جس کے ساتھ صارفین کو اضافی بونس بھی فراہم کیے جا رہے ہیں۔ جاز کی ویب سائٹ پر فونز کی قیمتیں ابھی تک درج نہیں کی گئیں لیکن توقع کی جا رہی ہے کہ بیس ماڈل آئی فون 16 کی قیمت 3,39,999 روپے، آئی فون 16 پلس کی قیمت 3,69,999 روپے، پرو ماڈل کی قیمت 4,79,999 روپے اور پرومیکس کی قیمت 5,69,999 روپے ہوگی۔ یہ فون نومبر میں فروخت کے لیے دستیاب ہونے کی امید ہے۔
مزید پڑھیں: سونے کی فی تولہ قیمت میں 3 ہزار روپے کی کمی
آئی فون 16 سیریز ملک بھر میں جاز کے تمام بزنس سینٹرز پر دستیاب ہوگی، جس سے صارفین کے لیے خریداری کا ایک آسان تجربہ فراہم کیا جائے گا۔ اس کے ساتھ پی ٹی اے کی منظوری اور ایک محدود ایپل وارنٹی بھی شامل ہوگی جو کہ ملک میں ایپل کے مجاز سیلرز کے ذریعے قابل دعویٰ ہوگی۔
جاز اور مرکنٹائل ایک خصوصی ٹریڈ اِن پروگرام بھی متعارف کرائیں گے جو موجودہ آئی فون صارفین کو اپنے پرانے فون کا تبادلہ کر کے نئے فیچرز سے لطف اندوز ہونے میں مدد دے گا۔ اس کے علاوہ جاز کی طرف سے مفت بنڈل پیکجز پیش کیے جائیں گے، جن میں ای-سم کی مفت ایکٹیویشن، 200 جی بی ماہانہ ڈیٹا، اور 5000 آل نیٹ ورک منٹس (2000 آف نیٹ ورک اور 3000 آن نیٹ ورک منٹس شامل) فراہم کیے جائیں گے۔
آئی فون 16 سیریز کے لیے دلچسپی کی رجسٹریشن اب کھلی ہے اور ویب سائٹ پر رجسٹریشن اور بونس کی مزید تفصیلات بھی دستیاب ہیں۔ جو صارفین رجسٹریشن کراتے ہیں، وہ خریداری پر ایپل کے خصوصی گفٹ کے لیے قرعہ اندازی میں بھی شامل ہو سکیں گے۔
