By پیرس کے مشہور دریائے سین پر اولمپکس 2024 کی رنگارنگ افتتاحی تقریب کا باقاعدہ آغاز ہو گیا، 205 ممالک کے دستوں کی کشتیوں پر دریائے سین میں آمد ہوئی، پیرس اولمپکس کی مشعل بھی روشن کردی گئی۔
تفصیلات کے مطابق دنیائے کھیل کے سب سے بڑے میلے پیرس اولمپکس کی افتتاحی تقریب میں دل کو چھو لینے والی موسیقی کی جھنکار کے ساتھ مشہور امریکی گلوکارہ لیڈی گاگا او ر گلوکارہ سیلین ڈیان نے آواز کا خوبصورت جادو جگایا، افتتاحی تقریب میں تین ہزار فنکار پرفارم کر رہے ہیں۔
افتتاحی تقریب کے دوران روایتی انداز میں مختلف ملکوں کے دستوں کی کشتیوں کے ذریعے دریائے سین میں آمد ہوئی، ایک کشتی پر دیگر 4 ملکوں کے دستوں کے ہمراہ پاکستانی دستے کی آمد ہوئی، پاکستانی دستہ نیوزی لینڈ، عمان، یوگنڈا اور ازبکستان کے ساتھ آیا۔
پیرس اولمپکس کی افتتاحی تقریب میں دستے کی آمد کے موقع پر پاکستان کے لیے میڈل کی سب سے بڑی اُمید جیولین تھروور ارشد ندیم نے پاکستانی پرچم تھاماہوا تھا، اُن کے ساتھ ایتھیلٹ فائقہ ریاض، سوئمرز جہاں آرا نبی، احمد درانی اور آفیشلز بھی موجود تھے۔
پاکستانی شوٹر ز کشمالہ طلعت، گلفام جوزف اور جی ایم بشیر ایونٹ کے مقام سے افتتاحی تقریب میں شریک نہ ہوسکے۔ پیرس اولمپکس میں پاکستانی شوٹرز کا امتحان آج سے شروع ہوگا، دن 1بج کر 30 منٹ پر گلفام جوزف 10 میٹر ائیر پسٹل جبکہ سہ پہر 3 بجکر 30 منٹ پر کشمالہ طلعت ویمن 10 میٹر ائیر پسٹل میں ایکشن میں ہو نگی۔
یہ بھی پڑھیں:پیرس اولمپکس کاباقاعدہ آغاز، پاکستانی شوٹرز افتتاحی تقریب میں شریک نہ ہوسکے
دوسری جانب پیرس اولمپکس میں شریک پاکستانی دستے کے اعزاز میں پاکستانی سفارتخانے کی جانب سے تقریب کا انعقاد ہوا جہاں وفاقی وزیر رانا ثنا ءاللہ نے بطور مہمان خصوصی شر کت کی۔
