ایس آئی ایف سی کے تعاون سے آئی ٹی شعبے کی برآمدات میں مسلسل اضافہ

خصوصی سرمایہ کاری سہولت کونسل کے تعاون سے آئی ڈی کے شعبےمیں مسلسل اضافہ ہونے لگا، حکومت نے اگلے 5 برس میں آئی ٹی برآمدات کو 15 ارب ڈالر زتک بڑھانے کا ہدف مقرر کر لیا۔

تفصیلات کے مطابق گزشتہ مالی سال میں آئی ٹی برآمدات 2اعشاریہ 6ارب ڈالر تک رہیں جو رواں سال میں 3.5ارب ڈالر تک بڑھنے کے امکانات ہیں۔ آئی ٹی شعبے میں برآمداتی صلاحیت کے پیش نظر حکومت نے رواں مالی سال میں 79ارب روپے سے زائد کی رقم مختص کی ہے۔

وفاقی وزیر خزانہ کا کہنا ہے کہ 79ارب روپے کی رقم میں سے 19ارب روپے کراچی اور اسلام آباد میں آئی ٹی پارک کے قیام میں صرف ہوں گے جبکہ 22ارب روپے پاکستان سافٹ وئیر ایکسپورٹ بورڈ کیلئے مختص کیے گئے ہیں۔

چئیرمین پاکستان آئی ٹی انڈسٹری ایسوسی ایشن کا کہنا تھا کہ ڈیجیٹل اکانومی کی صلاحیتوں کا بھرپور فائدہ اٹھانے کیلئے ہمیں آئی ٹی انفراسٹرکچر میں بہتری لانے اور ہنر مندافرادی قوت میں اضافے کی ضرورت ہے۔ چئیرمین پاکستان آئی ٹی انڈسٹری ایسوسی ایشن نے کہا کہ جدید صنعتی معیار کے مطابق آئی ٹی کے شعبے کی تعمیر کیلئے ڈیجیٹل انفراسٹرکچر اور انٹرنیٹ کی کنیکٹویٹی کو بڑھانے کی اشد ضرورت ہے۔