By پشاور(سید ذیشان) مشیراطلاعات بیرسٹرڈاکٹر سیف نے کہا ہے کہ وزیر اعلی کی ہدایت پر قائم کمیشن بہت جلد واقعے کے حوالے سےانکوائری رپورٹ جمع کرے گا، مذاکرات کا عمل شروع ہوتے ہی بنوں میں امن بحال ہوا۔
بیرسٹر سیف نے میڈیا سے گفتگو کرتے ہوئے کہا کہ بعض مسترد شدہ سیاسی ڈرامے باز بنوں واقعہ پر سیاست کی ناکام کوشش کر رہے ہیں۔ انتشار کی سیاست کرنے والوں کے منفی عزائم سے عوام باخبر ہے۔ انہوں نے کہا کہ وزیر اعلی خیبرپختونخوا بنوں کی صورتحال کو مسلسل مانیٹر کر رہے ہیں، واقعے کے فوری بعد وزیراعلی نے تمام مصروفیات چھوڑکر بنوں کے معاملات پر توجہ دی ہوئی ہے۔ کسی بڑے ناخوشگوار واقعے کی روک تھام صوبائی حکومت کی اولین ترجیح ہے ۔
یہ بھی پڑھیں: پی ٹی آئی رہنما شفقت محمود نے سیاست چھوڑنے کا اعلان
انہوں نے بتایا کہ بنوں انتظامیہ مسلسل وزیر اعلی کو آگاہ کررہے ہیں، مقامی انتظامیہ اور سماجی عمائدین پر مشتمل کمیٹی کے مذاکرات چل رہے ہیں۔ مذاکرات کا عمل شروع ہوتے ہی بنوں میں امن بحال ہوا۔ بیرسٹر سیف نے کہا کہ سماجی عمائدین اور انتظامیہ پر مشتمل کمیٹی علاقے میں دیر پا قیام امن کو یقینی بنائے گی، سماجی عمائدین پر مشتمل کمیٹی کی جلد وزیر اعلی سے ملاقات متوقع ہے۔
وزیر اعلی کی ہدایت پر قائم کمیشن بہت جلد واقعے کے حوالے سےانکوائری رپورٹ جمع کرے گا، خیبرپختونخوا دہشتگردی سے پہلے متاثر ہے اور کسی بھی بڑے سانحے کا متحمل نہیں ہو سکتا۔ مشیر اطلاعات کا مزید کہنا تھا کہ عوام کی جان و مال کی حفاظت صوبائی حکومت کی اولین ترجیحات میں شامل ہیں، انہوں نے عوام سے اپیل کی کہ شدت پسندی کے خاتمے کے لیے صوبائی حکومت اور مقامی انتظامیہ سے تعاون کریں ۔
