By انٹر بورڈز اسپورٹس پاکستان گرلز ہاکی ٹیم کا ترکش انڈر 16 نیشنل ہاکی ٹیم کیساتھ مقابلہ، میزبان ٹیم نے سیریز 1-2 سے جیت لی۔
تفصیلات کے مطابق انٹر بورڈز اسپورٹس پاکستان گرلز ہاکی ٹیم ڈاکٹر غلام علی ملاح ایگزیکٹو ڈائریکٹر انٹر بورڈز کوآرڈینیشن کمیشن (آئی بی سی سی) اسلام آباد کی سربراہی میں ترکی کے دورے پر ہے اور ترکش انڈر 16 نیشنل ہاکی ٹیم کے ساتھ تین میچوں پرمشتمل سیریز میں حصہ لیا۔
پہلا میچ ترکش گرلز ٹیم نے ایک کے مقابلے میں دو گول سے جیت لیا۔ پاکستان انٹر بورڈز اسپورٹس کی گرلز ہاکی ٹیم کی جانب سے کیپٹن شانزے نے گول اسکور کیا۔
جبکہ دوسرا میچ پاکستان انٹر بورڈز اسپورٹس ہاکی ٹیم نے شاندار کھیل کا مظاہرہ کرتے ہوئے ایک صفر سے جیت لیا گول سویرا نے اسکورکیا۔
سیریز کے تیسرے اور فیصلہ کن میچ میں دونوں ٹیموں نے شاندار کھیل کا مظاہرہ کیا اور ترکش ٹیم نے مقابلہ دو کے مقابلے میں تین گول سے جیت کر سیریز بھی اپنے نام کرلی۔اس میچ میں پاکستان انٹر بورڈز اسپورٹس کی طرف سے صباح اور طیبہ نے ایک ایک گول اسکور کیا۔ ترکش نیشنل ہاکی فیڈریشن کی جانب سے سیریز کو شاندار طریقے سے منعقد کیاگیا۔
اختتامی تقریب سے خطاب کرتے ڈاکٹر غلام علی ملاح نے کہا کہ بین الاقوامی مقابلے نہ صرف صحتمند جسم اور دماغ بناتے ہیں بلکہ بین الاقوامی دوستی کو بھی فروغ دیتے ہیں۔ دونوں ممالک کی نوجوان خواتین نے غیر معمولی مہارت، عزم اور ٹیم ورک کا مظاہرہ کرتے ہوئے ٹورنامنٹ کو شاندار کامیابی سے ہمکنار کیا۔ انہوں نے مزید کہا کہ وفاقی وزارت تعلیم کا ایسے پروگرام کی حوصلہ افزائی کرنے کا اقدام نوجوان خواتین کو کھیلوں میں بااختیار بنانے، صحت مند مقابلے کی حوصلہ افزائی اور کھیلوں کے ذریعے بین الاقوامی تعلقات استوار کرنے کی جانب ایک اہم قدم ہے۔
