By پنجاب کے سکولوں میں سٹیلائٹ انٹرنیٹ کی فراہمی کے لئے معاہدےپر دستخط کردئیے گئے۔
وزیر اعلیٰ پنجاب مریم نواز نے ڈی پی ایس ماڈل ٹاؤن میں پائلٹ سٹیلائٹ انٹرنیٹ پراجیکٹ کا افتتاح کیا، اس موقع پر شیخ احمد دلموک المکتوم کی سربراہی میں متحدہ عرب امارات کا وفد بھی ڈی پی ایس ماڈل ٹاؤن میں موجود تھا۔ مریم نواز نے ڈی پی ایس ڈیجیٹل لیب میں طالبات کے ساتھ بات چیت بھی کی، پنجاب میں ون ویب نیوم اور اے ڈی ایم ہولڈنگ کے تعاون سے سکولوں کو سٹیلائٹ انٹرنیٹ سے لنک کیا جائے گا۔ وزیراعلیٰ پنجاب مریم مواز سے یو اے ای کے شاہی خاندان کے رکن شیخ احمد دلموک المکتوم نے ملاقات بھی کی، ملاقات میں سٹیلائٹ انٹرنیٹ کی فراہمی اور ڈیجیٹلائزیشن کے امور پر تفصیلی تبادلہ خیال کیا گیا۔ یو اے ای کے وفد نے سکولوں میں سٹیلائٹ سے ڈائریکٹ انٹر نیٹ سروس فراہمی کے پروگرام پر مریم نواز کو مکمل بریفنگ دی، بریفنگ میں وزیر اعلیٰ پنجاب کو بتایا گیا کہ پہلے فیز میں ملک بھر کے 5,000 سکولوں کو سیٹلائٹ انٹرنیٹ کی فراہمی شروع کر رہے ہیں۔ مریم نواز کا اس موقع پر کہنا تھا کہ سٹیلائٹ انٹرنیٹ سے دوردراز کے دیہی اور شہری علاقوں کے طلبا ء کو آسانی ہو گی۔
انہوں نے کہا کہ پاکستان میں تعلیم میں ڈیجیٹل تبدیلی کے ایک نئے دور کا آغاز ہوچکا ہے، ڈیجیٹل سکلز سے طلباء کو بااختیار بنانے اور ڈیجیٹل معیشت کا حصہ بننے میں مدد ملے گی۔ شیخ احمد دلموک نے کہا سکولوں میں سٹیلائٹ انٹرنیٹ سروس میںپاکستان کی بھر پور معاونت کریں گے ۔ اساتذہ اور طلبہ پلگ اینڈ پلے ٹیکنالوجی سے انٹرنیٹ سے مستفید ہو سکیں گے ۔ انفارمیشن اینڈ کمیونیکیشن ٹیکنالوجی سے ہی پاکستان ترقی کی راہ پر گامزن ہو سکتا ہے۔ شیخ احمد دلموک کا مزید کہنا تھا کہ پنجاب میں سیٹلائٹ انٹرنیٹ پراجیکٹ کا حصہ بننے پر خوشی ہے۔ ون ویب نیوم کیساتھ شراکت جاری رکھنے اور اس کی کامیابی میں اپنا حصہ ڈالنے کے خواہش مند ہیں۔ اس موقع پر سینیٹر پرویز رشید، سینئر صوبائی وزیر مریم اورنگزیب، صوبائی وزراء عظمیٰ زاہد بخاری، رانا سکندر حیات اور دیگر حکام بھی موجود تھے۔
